Andeca

 

Ripáralle o trono ao seu predecesor Eurico, a quen enclaustrou nun mosteiro e casou coa súa muller coa fin de garantir a continuidade de sangue. Co gallo de mediar na desavinza dinástica, Leovixildo internouse en Galicia cos seus exércitos e, tras derrotalo, saqueou a capital (Braga), fíxose co tesouro real e anexionouse o Reino Suevo de Galicia.

Esta volvía á fe ariana na súa caste dirixente e ficaba convertida nunha unidade gobernativa e xurisdicional da monarquía visigoda de Hispania ao mando dun dux; este cargo será exercido en varias ocasións por fillos de monarcas que gobernaron a antigo territorio suevo a título de rei (Wamba, Vitiza). Andeca tamén foi obrigado a ingresar nun mosteiro, mais a nobreza que o aupara non semella que perdera, na nova dependencia política, o seu dominio territorial.

A crónica biclarense descualifícao como tirano ao non recoñecer a licitude da súa toma do poder e responsabilizalo da disputa que abriu as portas ao, tamén deostado pola crónica, rei Leovixildo.

Tras o destronamento de Andeca por parte dos visigodos, un nobre de liñaxe real, descendente do rei Miro chamado Malarico, encabezou unha rebelión para liberar o reino de Galicia das mans visigodas. A forte presenza militar visigoda no reino acabaría coa revolta no ano 586 e Malarico, sería apresado pouco antes da morte de Leovixildo.

A finais do século XIX o historiador Benito Vicetto transcribiu o seu nome Andeca ou Audeca como Xandeza ou Xan Deza, relacionando a raíz etimolóxica deste nome coa comarca do Deza.^{[Cómpre referencia]}

  Os reis e as raíñas da Galiza.

Miro, Eborico e Audeca. Os derradeiros reis suevos da Gallaecia de 570 a 585. (Nós Diario, 08.09.2022)

• López Carreira, Anselmo (2003). Os reis de Galicia. Vigo: Edicións A Nosa Terra. pp. 54–55. ISBN 84-96203-44-1. 

• Lista de monarcas de Galicia
• Reino suevo
• Lista de reis suevos
• Suevos