Sam Raimi

Sam Raimi

Biografía
Nacemento	23 de outubro de 1959 (65 anos) Royal Oak, Estados Unidos de América (pt)
Relixión	Xudaísmo
Educación	Universidade Estatal de Míchigan Birmingham Groves High School (en)
Actividade
Ocupación	actor, montador, actor de cinema, produtor delegado, produtor de cinema, guionista, director de cinema, realizador
Período de actividade	1977 -
Partido político	Partido Republicano
Membro de	Writers Guild of America, East (en)
Obra
Obras destacables (1981) The Evil Dead (pt) (1990) Darkman (pt) (2002-2007) Spider-Man trilogy (en) (2022) Doctor Strange in the Multiverse of Madness
Familia
Cónxuxe	Gillian Greene (1993–2024), divorcio
Fillos	Lorne Raimi, Henry Raimi, Oliver Raimi
Irmáns	Ted Raimi
Parentes	Lorne Greene, husband's father
Premios
(2014)  Premio Inkpot (1992)  Premio Máquina do Tempo (1990)  Sitges Film Festival Best Director award (en) , premiado polo traballo Darkman (pt)  The George Pal Memorial Award (en)
Descrito pola fonte	Obálky knih,

Samuel M. Raimi,^[1] nado en Royal Oak (Míchigan) o 23 de outubro de 1959,^[2] é un director, produtor e guionista estadounidense.^[3] Raimi é recoñecido polo seu traballo na dirección na triloxía sobre a personaxe de Spider-Man, estreada durante a década de 2000, ademais de polo seu labor como director de filmes de terror de baixo orzamento como a triloxía de The Evil Dead, que foi un dos seus primeiros proxectos.^[3]

Tamén participou en filmes realizados por colegas seus,^[3] como os irmáns Coen, para os que tamén foi axudante de dirección. Na década de 1990 tamén traballou para a televisión, como produtor de series como Hercules: The Legendary Journeys e Xena: Warrior Princess.

Raimi naceu no seu dunha familia de emigrantes xudeus de Rusia, por liña paterna, e de Hungría, pola materna.^[4] Foi educado no xudaísmo conservador.^[5][6] Raimi ten un irmán máis vello, o guionista Ivan Raimi,^[4] e un máis novo, o actor Ted Raimi.^[7] A súa irmá máis vella Andrea Raimi Rubin, é reporteira de tribunais.^[8] Outro irmán máis vello, Sander, faleceu afogado con quince anos; Raimi dixo que o trauma uniu fortemente o resto da familia.^[9] Raimi tamén mencionou que Sander foi que lle amosou a Spider-Man, iniciando o seu amor polas bandas deseñadas.^[10]

Sam Raimi comezou a afeccionarse á realización aos 13 anos, grazas a unha primitiva cámara de vídeo que tiña un amigo seu. Ata a edición de The Evil Dead, gravara uns trinta filmes de prácticas.^[5] O máis coñecido entre os seus amigos foi The Happy Valley Kid: The Story of a Sudden Driven Mad, a historia dun universitario que é humillado polos seus compañeiros e abandonado pola súa moza ata que tolea e acaba con todos eles.^[5]

En 1978, rodou unha curtametraxe de 32 minutos titulada Within the Woods que foi protagonizada polos seus amigos da Universidade de Míchigan Bruce Campbell e Ellen Sandweiss. Está considerada unha precuela de The Evil Dead. Un sólido apoio por parte da crítica e o permiso de varios exhibidores para amosar a curta axudaron a consolidar a validez do proxecto.^[11] Como resultado, Raimi comezou a traballar na longametraxe.

En 1981 escribiu e dirixiu unha das obras máis innovadoras da serie B, The Evil Dead, unha acertada combinación de humor negro, terror sobrenatural e cinema gore. Igual que Within the Woods, foi protagonizada por Bruce Campbell e Ellen Sandweiss e participaron tamén Richard DeManincor, Betsy Baker e Theresa Tilly. Nela, Raimi creou a icónica personaxe da saga Ash Williams, personificada por Bruce Campbell.

Tralo fracaso do seu filme Crimewave, Raimi rodou a secuela Evil Dead II (1987). Os primeiros minutos do filme volven contar a historia da primeira parte cambiando algúns elementos. O plan de Raimi era utilizar escenas de The Evil Dead, mais debido a problemas coas distribuidoras tivo que rodar de novo as escenas.^[12] A secuela contou cun orzamento de 3,6 millóns de dólares,^[13] case dez veces maior ca o de The Evil Dead.

Unha terceira parte da saga, titulada Army of Darkness, foi estreada en 1992. A historia está ambientada no ano 1300, época á que foi transportado Ash tras ser atrapado por un portal creado ao final de Evil Dead II. A diferenza das dúas primeiras partes, esta caracterizouse por ser máis cómica que terrorífica. O proxecto tivo un orzamento estimado de 13 millóns de dólares.^[14]

Ao longo da súa traxectoria como realizador, Raimi creou unha gran variedade de filmes que van desde a comedia de slapstick^[15][16] ata o terror máis gore. Entre elas esta a saga de éxito Spider-Man, protagonizada polo actor Tobey Maguire, que contou con cameos de Bruce Campbell e do creador do superheroe Stan Lee, con quen Raimi trabou unha grande amizade. Ademais, Raimi é un activo produtor.

Raimi casou en 1993 con Gillian Greene, filla do actor Lorne Greene. Teñen cinco fillos, dos cales tres (Emma Rose, Lorne e Henry) apareceron como extras en Drag Me to Hell e na batalla final do filme Spider-Man 3.^[17]

Wikimedia Commons ten máis contidos multimedia na categoría:  Sam Raimi