Frances Marion

Frances Marion

Biografía
Nacemento	18 de novembro de 1888 San Francisco (Estados Unidos de América)
Morte	12 de maio de 1973 (84 anos) Os Ánxeles (Estados Unidos de América)
Causa da morte	doenza cardiovascular
Actividade
Campo de traballo	Guión cinematográfico, dirección de cine e xornalismo
Ocupación	guionista, actriz de cinema, actriz, directora de cinema, escritora, novelista, xornalista, guionista de cinema
Período de actividade	1912 -
Membro de	Writers Guild of America, West
Pseudónimo literario	Francis Marion Frank M. Clifton
Familia
Cónxuxe	George W. Hill (1930–1933) Fred Thomson (1919–1928)
Premios
(1931)  Óscar ó mellor argumento, premiado polo traballo O Campeão (pt) (1929)  Academy Award for Best Writing (en) , premiado polo traballo The Big House (pt)
Descrito pola fonte	Obálky knih, The St. James women filmmakers encyclopedia (en)

Marion Benson Owens, nada en San Francisco o 18 de novembro^[1] de 1888 e finada nos Ánxeles o 12 de maio de 1973, foi unha xornalista, escritora e guionista estadounidense, coñecida como Frances Marion, decotío citada como unha das mulleres guionistas máis destacadas do século XX, xunto con June Mathis e Anita Loos. Foi a primeira guionista en recibir dous premios Oscar.

Marion naceu en San Francisco (California), filla de Len Owens e Minnie Benson.^[2] Tiña unha irmá máis vella, Maude, e un irmán máis novo, Len.^[2] Os seus pais divorciáronse cando ela tiña dez anos e marchou vivir coa súa nai. Abandonou a escola aos doce anos tras ser pillada debuxando unha banda deseñada da súa mestra. Pasou logo a unha escola en San Mateo e despois a unha escola de arte de San Francisco cando tiña dezaseis anos. Esta escola foi destruída no terremoto de San Francisco de 1906.^[3]

Mentres estaba en San Francisco traballou como axudante de fotografía de Arnold Genthe e experimentou co deseño fotográfico e os filmes en cor. Máis tarde traballou como artista comercial para Western Pacific Railroads e como reporteira do San Francisco Examiner. Despois de mudarse aos Ánxeles foi artista de carteis no Morosco Theater, ademais de deseñar anuncios nunha empresa de publicidade.^[4]

No verán de 1914 foi contratada como guionista axudante, actriz e axudante xeral por "Lois Weber Productions", produtora propiedade da pioneira directora cinematográfica Lois Weber. Puido converterse en actriz, mais prefería o traballo detrás das cámaras. Aprendeu a escribir guións de Weber, e de feito escribiu un para ela, mais despois queimouno.

Marion traballou como xornalista e foi correspondente durante a primeira guerra mundial.^[5] Documentou a contribución das mulleres ao esforzo bélico na fronte e foi a primeira muller en cruzar o Rin tralo armisticio.^[6]

Escribiu co nome de Frances Marion moitos guións para a actriz Mary Pickford, incluíndo os de Rebecca of Sunnybrook Farm e The Poor Little Rich Girl. Tamén escribiu guións para outros filmes de éxito das décadas de 1920 e 1930. Durante eses anos gañaba un salario de 50 000 dólares ao anos, cantidade inaudita nese tempo.^[7] Foi a primeira muller en gañar un Oscar ao mellor guión adaptado, que conseguiu en 1930 polo filme The Big House e dous anos despois gañou o Oscar ao mellor argumento por The Champ. En total participou en máis de 300 guións e máis de 130 filmes. Tamén dirixiu e actuou de xeito ocasional nalgúns dos primeiros filmes de Mary Pickford.

Durante moitos anos estivo baixo contrato con MGM Studios, mais a pesar da súa boa posición, abandonou Hollywood en 1946 para dedicar máis tempo a escribir teatro e novelas.

Faleceu en 1973 a consecuencia da rotura dun aneurisma.^[8]

Marion casou en catro ocasións, as dúas primeiras, con Wesley de Lappe e Robert Pike, antes de cambiar o seu nome. En 1919 casou co actor Fred Thomson, que protagonizou con Mary Pickford The Love Light en 1921.^[5] Era amiga tan íntima de Pickford, que foron xuntas de lúa de mel cando Pickford casou con Douglas Fairbanks e Marion con Thomson.^[7] Tralo inesperado pasamento de Thomson en 1928, casou co director George W. Hill en 1930, aínda que o matrimonio finalizou en divorcio en 1933. Tivo dous fillos, Fred C. e Richard (adoptado). Fred chegou a ser editor das obras de George Eliot.

• Minnie Flynn. Nova York: Boni and Liveright, 1925
• The Secret Six. NY: Grosset & Dunlap, 1931 [novela a partir de su propio guion]
• Valley People. Nova York: Reynal & Hitchcock, 1935
• How to Write and Sell Film Stories. NYNova YorkCovici-Friede, 1937
• Molly, Bless Her. Nova York: Harper & Brothers, 1937
• Westward The Dream. Garden City Nova York: Doubleday and Company, 1948
• The Passions of Linda Lane. Nova York: Diversey Publications, 1949
• The Powder Keg. Boston: Little, Brown & Co., 1953
• Off With Their Heads!: A Serio-Comic Tale of Hollywood. Nova York: The Macmillan Company, 1972 [memorias]

Wikimedia Commons ten máis contidos multimedia na categoría:  Frances Marion

• Beauchamp, C. Marion, Frances. American National Biography Online, febreiro de 2000.
• Beauchamp, Cari (1997). Without lying down: Frances Marion and the powerful women of early Hollywood. Berkeley: University of California Press. ISBN 0-520-21492-7. 

• Without Lying Down: Frances Marion and the Power of Women in Hollywood
• Frances Marion Arquivado 24 de decembro de 2017 en Wayback Machine. en Women Film Pioneers Project