Famee

Une famee e je fate di un grup di personis che a vivin insiemi o di plui grups di personis che a àn une dissendence da un stes von, da une union legâl o da une adozion.

Tra i varis familiârs a son dai grâts di parintât.

Te declarazion universâl dai dirits dal om si dîs che “la famee e je la unitât naturâl e fondamentâl de societât e e à di jessi protezude dal Stât e de societât”

Te etâts plui antighis, ma ancje in tancj societâts diferentis in timps plui dongje al dì di vuê, a si cjatavin diviers elements comuns.

In prin a jere une dominance dal om su la femine, il matrimoni al jere dispès un contrat fra lis fameis di provignince e il rapuart al jere monogamic (ma in diviersis societâts l'om al podeve vê des concubinis),

E esisteve la possibilitât di finì il matrimoni cun cualchi forme di divorzi o di repudi de femine.

Pai Grêcs e pai Romans a fasevin part de famee ancje i parincj, i servidôrs e i sclâfs di cjase. Lis invasions dai Barbars a àn puartât a une definizion di famee plui grande dentri de tribù (clan).

Cu la etât di mieç te famee Europeane si è fate sintì la influence de religjon cristiane. No jerin permetudis formis di poligamie ni si podeve divorziâ.

Tal secul XX une schirie di cambiaments a àn mudât la famee tradizionâl. La secolarizazion de societât e la impuartance minôr de Glesie, la possibilitât di divorziâ, il fat che lis fameis a sedin simpri plui piçulis, il fat che lis feminis a rivin a fâ valê simpri di plui i lôr dirits a son dai elements che a àn vût la lôr impuartance.

A zornade di vuê dongje la famee tradizionâl a si cjatin un numar rilevant di personis ca vivin insiemi cence jessisi sposadis. I politics a discutin se dâ cualchi forme di tutele juridiche ancje a chestis fameis di fat o se no fâlu ritignint just difindi dome la famee tradizionâl.