Bandiere dal Friûl

 

La origjin de bandiere e rimonte ae ete dal Stât patriarcjâl di Aquilee, clamât ancje Patrie dal Friûl o Stât patriarcjâl furlan, che dal 1077 al 1420 al à guviernât il Friûl tant che stât sovran, vassal dal Sacri Roman Imperi, e in moments alternis ancje altris teritoris (tant che la Istrie, il Cjadovri, la Carinzie, il Cragn e la Stirie).

 

 

L’esemplâr plui innomenât e antîc de bandiere patriarcjâl al è in mostre tal Museu dal Domo di Udin. Si trate di un drap maraveôs di forme cuadrangolâr (61 x 65,5 cm) di sede colôr grise celeste cuntune acuile tal mieç che e à il cjâf voltât a çampe. Il cuarp, lis çatis e lis alis a son di colôr zâl, lis sgrifis di colôr ros. La bandiere e jere part dal furniment funerari dal Beât Beltram di Saint Geniès, patriarcje di Aquilee dal 1334 al 1350, sassinât in maniere barbare intune conzure di nobii furlans^[2].

 

A son diviersis ipotesis sul parcè de sielte di doprâ une acuile tant che simbul, ma no 'nd è nissune che si poi su provis avonde validis. Par cualchidun, la steme e fâs riferiment ae fondazion di Aquilee (dut câs, al è pardabon ciert che chest toponim nol derivi de peraule latine aquila, ma pluitost des fevelis celtichis)^[3]. Cualchidun altri al stime che e puedi jessi une riproduzion de steme nobiliâr dal patriarcje Beltram^[4], ma il so sigjil, conservât tai Museus Civics di Udin (inv. N. 413), al dimostre che il blason nobiliâr dal patriarcje ocitan al jere un scût cun traviers^[2].

 

 

No convinç nancje la teorie che no sarès une acuile, ma un variûl^[5], pal fat che te eraldiche il "grifone" al è simpri rapresentât tant che une figure imagjinarie. A sostignî cheste ipotesi no vâl nacje la osservazion che il cjâf e il golâr a somein plui a chei di un variûl che a chei di une acuile, pal fat che si trate di un dissen stilizât medievâl. Invezit, dal dut ciert al è che la acuile, tant che simbul de Patrie dal Friûl, e sedi stade doprade za plui di un secul prin de bandiere dal '300.

Di fat, il simbul de acuile al caraterizave il patriarcjât ben prin dal patriarcje Beltram. Nus al confermin i reperts numismatics che cun sigurece a incuadrin la adozion de acuile patriarcjâl tal principi dal 1200, sot dal ream di Volchîr di Erla, patriarcje dal 1204 al 1218. Une altre acuile che e somee a chê di Beltram e je chê che si viôt tes monedis coniadis dal patriarcje Bertolt di Andechs-Merania, sucessôr di Volchîr tal rezi la Patrie dal Friûl, dal 1218 al 1251. Ancje tes monedis coniadis dal patriarcje Raimont Torian (al à vuidât il Stât furlan dal 1273 al 1298) a son someancis evidentis cu la acuile di Beltram^[6].A Udin, une antighe piture a fresc colorade, visibile te façade dal Palaç Susane di Prampar (Palazzetto Puppi) che e da su vie Savorgnane, e mostre propit une acuile furlane.

La leç regjonâl dai 27 di Novembar dal 2001, n. 27, de Regjon Autonome Friûl-Vignesie Julie^[7] e à definît e ricognossût la bandiere dal Friûl in forme uficiâl.

La bandiere e je formade di un drap di forme retangolâr cun al centri une acuile eraldiche di aur cun alis spleadis, cjâf a çampe, bec viert e sgrifis rossis, metût in cjamp celest. La steme e à dimensions pâr a trê cuints de altece de bandiere che a sô volte e à di jessi alte doi tierçs de sô lungjece^[7].

La bandiere si espon in maniere uficiâl intai lûcs publics dai comuns che a fasin part de minorance linguistiche furlane, dongje de bandiere de Regjon Autonome Friûl-Vignesie Julie, di chê taliane e di chê de Union Europeane.

In particolâr, e je esponude - sedi dai ents publics che dai privâts citadins - in ocasion de ricorence dai 3 di Avrîl, aniversari de istituzion dal Stât patriarcjâl di Aquilee, ricognossût de leç regjonâl dai 27 di Març dal 2015, n. 6, de Regjon Autonome Friûl-Vignesie Julie, tant che Fieste de Patrie dal Friûl.

La bandiere te version doprade vuê e je stade dissegnade tai prins agns '70 di Giorgio Jus (di San Vît dal Tiliment) su indicazion dai dirigjents dal Moviment Friûl: e stilize in forme moderne la bandiere medievâl origjinâl. Il prin prototip de bandiere moderne furlane al è stât stampât a Codroip ai 24 di Lui dal 1974 par cure dal Moviment Friûl; sot de acuile e jere la scrite “FRIÛL”^[8].

Lis stemis di diviersis istituzions modernis si son ispiradis ae bandiere furlane, par esempli chês de ex Provincie di Udin, de Universitât dal Friûl, de citât di Aquilee, de Societât Filologjiche Furlane. I fonts dai gonfalons des ex Provinciis di Pordenon e di Gurize a copiavin i colôrs principâi de bandiere furlane, il zâl e il celest. Dal 1923 al 1927 la bandiere furlane e à fat di steme pe Provincie dal Friûl.

Intun manoscrit dal Sîscent conservât te Biblioteche Civiche di Udin si lei che il Stât patriarcjâl furlan al veve une insegne di pueste di doprâ in timp di vuere, e si le descrîf cussì: “Il patriarca d’Aquileia ne li suoi stendardi da guerra portava per insegna una mitra nel mezzo di due pastorali bianchi in campo vermiglio”^[9].

 

Dut câs, si à di notâ che di cualchi an incà, su tancj barcons e in diviersis manifestazions, si espon une bandiere di vuere divierse di chê storiche origjinâl: e je in dut compagne a chê ricognossude par leç, ma no tal drap, che invezit al è colôr di ros^[10].

Une altre version de bandiere furlane, ma doprade pardabon pôc, e je chê cuntun drap fat di trê listis orizontâls di misure compagne, di colôr celest, zal e celest, cualchi volte cu la zonte o di une stele a cinc pontis (zale o rosse), o pûr di une acuile.

No si à di confondi la bandiere dal Friûl cun chê de istituzion aministrative “Regjon Autonome Friûl-Vignesie Julie” par vie de acuile, che i somee, ma e je intune posizion divierse. La bandiere de Regjon e je resinte, dal 1963, e il significât dal so simbul nol è propit autonomist^[11].

Il Stât furlan al veve un so vessilifar. L'ultim di chescj al fo Marc di Murùs (Marco da Moruzzo). La Republiche di Vignesie, dopo de rese de Patrie dal Friûl ai 6 di Jugn dal 1420, lu veve metût in preson tal Cjistiel di Udin pal vie de sô fedeltât al patriarcje. Par colpe di une malatie cjapade stant li dentri, al murì. I judiçs de Serenissime a ordenarin la decapitazion dal so cadavar ai 19 di Març dal 1421^[12].

1. ↑ https://arlef.it/it/risorse/bandiera-del-friuli/
2. ↑ ^{2,0 2,1} Bertone M.B. (par cure di), I tessili dei patriarchi: paramenti sacri dal 13. al 20. secolo nella Cattedrale di Santa Maria Annunziata, Tolmezzo, 2015
3. ↑ http://www.istitutladinfurlan.it/daf/aquila/3
4. ↑ http://www.istitutladinfurlan.it/it/fiestedepatrie/simbuinazionai
5. ↑ Dibattito morsanese: Ulteriori sviluppi sulla storia della bandiera del Friuli
6. ↑ https://web.archive.org/web/20200220105950/http://www.friulani.net/bandiera-friulana/
7. ↑ ^{7,0 7,1} http://lexview-int.regione.fvg.it/FontiNormative/xml/xmlLex.aspx?anno=2001&legge=27&lista=0&fx=lex
8. ↑ Walter Tomada, Restyling per amor di Patria. A disegnare la versione moderna del simbolo del Friuli è stato nel 1974 l’autonomista Giorgio (Zorç) Jus. E nonostante oggi sventoli su tantissimi balconi, lui non ha mai preteso un soldo per i diritti d’autore, in Il Friuli, nr. 15 del 17 aprile 2020.
9. ↑ Manin O., Memorie e notizie, Biblioteca Civica di Udine, ms 619/1
10. ↑ http://www.lapatriedalfriul.org/?p=18882
11. ↑ “Buora: Ma quella della Regione è l'aquila dei sotans”, Messaggero Veneto, 19 luglio 2008, https://ricerca.gelocal.it/messaggeroveneto/archivio/messaggeroveneto/2008/07/19/UD_03_UDC1.html?ref=search
12. ↑ http://aquileianova.altervista.org/i-friulani-contro-il-coronavirus-con-la-bandiera-delleroico-marco-di-moruzzo/