Austrie

Ai timps dal Imperi Roman l'Austrie e jere part de provincie de Rezie. Daspò de fin dal Impero e fo invadude pi voltis di popolazion che vignivin di est; dal X al XIII Secul e fo sot dal domini de famee dai Babenberg, che a forin parâts vie dai Asburgo, che a àn governât chest paîs, deventât al centri di un grant imperi, fin al 1918. Dal 1867 l'Imperi al fo unît intune dople monarchie, formant l'Imperi di Austrie-Ongjarie.
Daspò de disfate inte Prime Vuere Mondiâl e fo ocupade militarmentri dai talians e da lis trupis da l'Intese a la fin dal 1918, si proclamà daurman Deutschösterreich "Austrie todescje" aspirant di unîsi a la Gjermanie sot il model dal principi di nazionalitât. Cul tratât di Saint-Germain tal novembar dal 1919 i fo proibide la denominazion di "Austrie todescje" e l'union al Reich todesc. L'esercit al fo ridot a 30.000 oms e e pierdè il Tirôl meridionâl (Trentin e Sud Tirôl), la Val Cjanâl (tocs de Carintie e dal Cragn), la contee di Gurize e Gardiscje (o Friûl orientâl, l'Istrie, Triest e il distret di Postumie (toc dal Cragn) a pro da l'Italie; Un toc dal Staiar, il Cragn e un toc de Carintie cu la Dalmazie e fo dade a la Jugoslavie. La Republiche democratiche austriache, e durà fin tal 1933, po e fo instaurade la ditature nazionaliste di Dolfuss, che al fo copât dai nazional-socialiscj. Tal 1938 la Gjermanie di Hitler si anetè l'Austrie arbitrariementri.
Daspò de Seconde Vuere Mondiâl l'Austrie e Viene a forin ocupadis e dividudis in 4 setôrs: francês, britanic, merecan e sovietic sicu la Gjermanie e Berlin. L'Austrie e tornà a vê l'indipendence dome tal 1955, a condizion che e restàs un paîs neutrâl. Cul crac dal Comunisim, il paîs jentrà in pôcs agns inte Union Europeane (1995) e inte zone dal Euro (1999).

Il paîs al è scuasit dal dut montagnôs o colinâr; lis unichis planuris a son logadis a Nord-Est, intes zonis di Linz, Viene e al confin con Slovachie e Ongjarie.

Il mont plui alt de Austrie al è il Großglockner (3798 m), logât inte cjadene des Taurs.

Elenc dai principâi flums de Austrie:

• Danau: al traviers lis regjons de Alte e Basse Austrie da Ovest a Est, bagnant lis citâts di Linz e Viene
• Inn: flum dal Tirol, al bagne Innsbruck
• Drau: flum ch'al nas in Italie, al pase in Tirol e Carintie, al seguite il sô cors in Slovenie par butâsi daspò intal Mâr Neri
• Gail: flum ch'al scor in Carintie, afluent de Drau

Inte zone montagnose la clime e je crude in Unviêr, con tantis precipitazions e temperaduris dificilmentri parsore dai 0°; lis Istâts a son dolcis (20-25°). Inte planure (Linz, Viene) si regjistrin mancul precipitazions, e carateristichis di une clime plui continentâl.

Il todesc al è le lenghe ufiziâl, fevelade da scuasit ducj i abitants. Ancje la lenghe dai segns e je ufizialmentri ricognossude.

A esistin minorancis slovenis in Carintie e in Stirie e ongjaresis e cravuatis (dal Burgenland) intal Burgenland. Lis lenghis di chestis minorancis a son ricognossudis tant che lenghis ufiziâls a nivel dai rispetîfs stâts federâts austriacs dulà che a son feveladis.

Par aprofondî l'argoment viôt la vôs Länder austriacs.

L'Austrie e je une republiche federâl, dulà che lis nûf regjons (Bundesländer) a 'nd àn une vore di autonomie.

		Stât (Bundesland)	Capitâl	Popolazion
	1	Alte Austrie (Oberösterreich)	Linz	1.399.226
	2	Basse Austrie (Niederösterreich)	Sankt Pölten	1.575.291
	3	Burgenland (Burgenland)	Eisenstadt	278.655
	4	Carintie (Kärnten)	Clanfurt	560.089
	5	Salisburghês (Salzburgland)	Solsburc	526.875
	6	Stirie (Steiermark)	Graz	1.199.489
	7	Tirol (Tirol)	Innsbruck	693.651
	8	Viene (Wien)	Viene (Wien)	1.637.772
	9	Vorarlberg (Vorarlberg)	Bregenz	362.258

Il president federâl al è elet ogni 6 agns e al à di sielzi il cancelîr federâl, in gjenar rapresentant dal partît che al à cjapât plui vôts intes elezions.

La Austrie e je frecuentade dai turiscj soredut par sport (schi e altris sports invernâi); lis citâts plui visitadis a son Viene (capitâl de Republiche in dì di vuê e capitâl dal ex-imperi) e Solsburc (citât di nassince di Mozart).

• Länder austriacs