Diplôido

Cél articllo est ècrit en arpetan supradialèctâl / ORB lârge.

Na cèlula biologica est diplôida (du grèco ancian : διπλόος, diploos, « doblo » et εἶδος eidos, « en fôrma de ») quand los cromosomos que contint sont presents per pârs (2n cromosomo). Lo concèpto est g·ènèralament l’oposâ de haplôido, tèrmo que dèsigne les cèlules a cromosomos en simplo ègzemplèro (n cromosomos).

Na cèlula compte adonc doux alèlos por châcun de sos gènos (en defôr de les parties spècefiques ux cromosomos sèxuâls), los doux cromosomos d’un mémo pâr qu’ant los mémos gènos. Celes doves vèrsions sont d’origina matèrnâla por yona et patèrnâla por l’ôtra, et pués sont étâyes rassemblâyes pendent la fècondacion (rencontro de doves cèlules haplôides : n + n = 2n).

Un organismo ou ben na partia d’organismo est dét diplôido quand ses cèlules sont lor-mémes diplôides.

Celes dèfinicions regârdont solament los organismos ecariotos (protistos, bétyes, plantes, champegnons), qu’ant de verés cromosomos. Per ègzemplo, betont vêr defôr les bactèries qu’ant gins de noyél et pués possèdont de cromosomos d’un tipo a pârt.

La reproduccion sèxuâye que demande ’n èchanjo gènètico emmode de mècanismos de rèduccion (mèyosa) et d’ôgmentacion (fècondacion) de la rèpèticion des cromosomos (plôidia). Lo cicllo de via d’un organismo ecarioto comprend vêr forciêment n’altèrnance de stados a nivéls de rèpèticion cromosomica difèrents : prèjont d’altèrnance de fâses (vêre cicllo de via).

Chiéz los homos et la plepârt de les bétyes, la fâsa diplôida (2n) est franc dominenta. L’organismo (lo côrp) sè dèvelope tot avouéc de cèlules que contegnont châcuna los cromosomos en dobla vèrsion. La fâsa haplôida (n), por lyé, regârde ren que la formacion des gamètos : spèrmatozôido ou ben ovulo.

Chiéz les moces et chiéz quârques algues, lo sch·èmâ est envèrsâ : la fâsa diplôida (2n) acompagne ren que rudo vito la fècondacion. La planta sè dèvelope grâce a la mèyosa, desot fôrma haplôida (n). Chiéz les fioges et les plantes a granes (ou ben spèrmafitos), la fâsa diplôida prèdomine.

La diplôidia at possu étre favorisâye perce que pèrmèt de rèparar les cassures doblos-brins de l’ADN. Pèrmèt étot de mascar l’èfèt de les mutacions nuisibles, que sont por la plepârt rècèssives^[1].

• Sporofito

1. ↑ (fr) Thierry Lefevre, Michel Raymond, Frédéric Thomas, Biologie évolutive, De Boeck Supérieur, p. 148.