Real Racing Club de Santander

Real Racing Club de Santander

Ezizena(k)	Montañeses, Verdiblancos, Racingistas
Sorrera	1913
Futbol zelaia	El Sardinero estadioa edukiera: 22.500 lagun inaugurazioa: 1988
Jabea	Alfredo Pérez
Entrenatzailea	José Alberto López
Liga	Bigarren maila
2023-24	7.a
Webgunea	Webgune ofiziala
Etxekoa 　 Kanpokoa

Real Racing Club de Santander 1913an sortutako Santanderko futbol taldea da. Gaur egun Espainiako futbol ligako bigarren mailan jokatu arren talde historikoa da, izan ere lehen mailan gehien aritu den 12. taldea baita.

Santander Racing Club taldeak 1913ko otsailaren 23an jokatu zuen bere lehen partida Strong de Santander taldearen aurka eta galdu egin zuen. Ángel Sánchez Losada izan zen taldearen lehen presidentea baina bazkideen artean euskaldun batzuk ere baziren, hala nola Mateo Zubizarreta eta Carlos Iruretagoyena. Racingen lehen gola ere euskaldun batek sartu zuen, Mariano Zubizarretak.

Hasieran Iparraldeko Federazioan sarturik gelditu zen, beste talde kantabriar eta bizkaitarrekin batera. 10. hamarkadan talde indartsua osatu zuen eta aurkari gogorrenak Kantabriako Santander FC eta Real Santander eta Bizkaiko Athletic Club eta Unión Fortuna Deustu izan zituen.

1922an Federazioa banatu eta kantabriarrek osaturiko txapelketatan hartu zuen parte, oso emaitza onak lortuz, izan ere 1940 artean Kantabriako 17 txapelketa irabazi baitzituen.

1928/29an izan zen lehen liga txapelketa eta Racing lehen mailan kokatua izan zen. Horretarako hainbat eliminatoria jokatu behar izan zituen eta partida guztiak irabazi zituen, tartean Valencia, Betis eta Sevillari. Ligan ordea azken postuan gelditu zen. Hala ere promozio partida jokatu zuen Sevillaren aurka eta lehen mailan mantentzea lortu zuen.

1930/31 denboraldia bikaina izan zen, ligan bigarren egin baitzuen. Aipatu behar da urte hartan lehenengo hirurak (Athletic Club, Racing eta Erreala) 22 punturekin berdinduta gelditu zirela eta gol kopuruaren arabera kokatu zirela. Firth Nottingham ingelesa zen entrenatzailea orain arte klubak lorturiko posturik onena izan zen honetan. 1933/34ean hirugarren egin zuen ligan.

Gerra Zibilak taldea erabat desitxuratu zuen, jokalaririk onenak hilda edo ihes eginda baitzeuden. Izena ere aldatu behar izan zuen, frankismoak ez baitzituen atzerriko izenak onartzen, horrela Real Santander Sociedad Deportiva izena izan zuen 1973 arte. 1939/40 urtean bigarren mailara jeitsi zen eta 1943 eta 1947an hirugarren mailan ere izan zen. 50 eta 60 hamarkadetan lehen maila ezagutu zuen baina beita bigarren eta hirugarrena ere.

1972/73 denboraldian hirugarren mailara jeisteko zorian egon ondoren zuzendaritzak Jose Maria Maguregi entrenatzaile bizkaitarra fitxatu zuen. Porrotik ez zuten bitartean bibotea uztea erabaki zuten jokalari eta entrenatzaileek eta emaitza onak izanik "biboteen taldea" ezizena eman zitzaion. Europa mailan ere ezagun egin zen honegatik. Urte hartan bertan lehen mailara igotzea lortu zuen.

Diruz ondo ibili ez arren 1987ra arte jarraitasun handia izan zuen lehen mailan. Urte horretatik hasita 6 urte egin zituen beheko mailan, tartean bat Bigarren B mailan, baina 1993/94 urtetik aurrera lehen mailan aritu izan da aurten arte. Aipatzekoa da 1999/2000 denboraldia, izan ere lehen aldiz Racingeko jokalari batek, Salva Ballesta zaragozarrak, Pichichi saria eskuratu baitzuen. Urte horretan bertan Munitisek ere Espainiako selekzioarekin jokatu zuen.

2001/02 denboraldiaren erdian diru arazoak medio taldea desagertzear egon zen, baina Dimitri Piterman enpresari ukrainarrak erosi zuen. Urtebete iraun bazuen ere taldea desagertzetik salbatu zuen. Azken denboraldi bikaina 2007/08koa izan zuen UEFAko postuetan bukatu zuelarik. 2010/11 urtean Ahsan Ali Syed enpresari indiarrak erosi zuen Racing. Taldea Espainiako talde onenen artean ipini nahi zuen arren emaitzak ez ziren onak izan eta diru arazoak tarteko, bi aldiz jarraian mailaz jaitsi zen. Mendeurrenaren ospakizunak erabat ilundu zituen honek.

2014ko urtarrilean jokalariek mehatxu egin zuten Errealaren aurkako partida ez zutela jokatuko zuzendaritzak dimisioa aurkezten ez bazuen. Azkenean planto egin zuten baina Tuto Sañudo jokalari mitikoa buru zuen akziodun talde batek hartu zuen gidaritza. Urte horretan bertan Bigarren B mailatik igotzea lortu zuen. 2014-15 denboraldian azken partidararte 2. maila mantentzear egon zen, baina luzapenean Osasunak lorturiko berdinketaren erruz 19. postuan gelditu eta maila galdu zuen. Hurrengo urteetan igo eta jeitsi ibili da. 2022an abiatu zen 1. maila RFEF ligako aurreneko txapelduna izan zen.

2023-24 denboraldia oso ondo amaitu zuen eta azken uneko kontrako gol batek utzi zuen igoera play-offetarako posturik gabe, seigarrenarekin puntutan gelditu zen arren.

• Santander Racing Club (1913-1914)
• Real Santander Racing Club (1914-1931)
• Racing Club de Santander (1931-1939)
• Real Santander Sociedad Deportiva (1939-1973)
• Real Racing Club de Santander (1973-tik aurrera)

Sortu berritan, lehenengo bi urteetan kolore gorria eta zuria erabili zituen, Santanderko eta ondoren Kantabriako banderaren koloreak hain zuzen ere. Baina ordutik aurrera bere armarrian ageri diren berde eta zuria erabili izan ditu kamisetan, batzutan marratua eta besteetan kamiseta zuria alboetan marra berdearekin. Prakak beltzak izan dira.

2008-09 urtean Europan aritu zenean bigarren ekipaziorako zuria eta gorria berrerabili zituen.

2012-13an ehungarren urteurrena ospatzen zela eta, lehenengo ekipazioa erabat aldatu eta kolore gorria eta zuria berreskuratu zituen. Urtebeteko keinua izan zen, ondoren berriz ere kolore zuria eta beltza hartu zituen.

1913-1915

1922

1932-1936

1952-tik

Centenario 2013

2014-2016	2016-2017	2017-2018	2018-2019	2019-2020	2020-2021
2021-2022	2022-2023	2023-2024

2024-25 barne:

• Denboraldiak 1. mailan: 44
• Denboraldiak 2. mailan: 38
• Denboraldiak 2. B mailan: 7
• 1. maila RFEF: 1
• 2. maila RFEF: 0
• Denboraldiak 3. mailan: 4
• Ligako posturik onena: 2.a Lehen mailan (1930-31)

Urtea	Maila	Postua	Errege Kopa	Europa
1999-00	Lehen maila	15.a	2. itzulia
2000-01	Lehen maila	19.a (jeitsi)	1/4
2001-02	Bigarren maila	2.a (igo)	1/64
2002-03	Lehen maila	16.a	1/64
2003-04	Lehen maila	17.a	1/32
2004-05	Lehen maila	16.a	1/32
2005-06	Lehen maila	17.a	3. itzulia
2006-07	Lehen maila	10.a	1/32
2007-08	Lehen maila	6.a	Finalerdiak
2008-09	Lehen maila	12.a	1/16	Liga fasea (Europa League)
2009-10	Lehen maila	16.a	Finalerdiak
2010-11	Lehen maila	12.a	1/32
2011-12	Lehen maila	20.a (jeitsi)	1/16
2012-13	Bigarren maila	20.a (jeitsi)	3. itzulia
2013-14	Bigarren B maila	1.a (I multzoa)	1/4
2014-15	Bigarren maila	19.a (jeitsi)	-
2015-16	Bigarren B maila	1.a (I multzoa)	1. itzulia
2016-17	Bigarren B maila	2.a (I multzoa)	3. itzulia
2017-18	Bigarren B maila	5.a	1. itzulia
2018-19	Bigarren B maila	1.a (igo)	1/16
2019-20	Bigarren maila	22.a (jeitsi)	1. itzulia
2020-21	Bigarren B maila	2.a	1. itzulia
2021-22	1. maila RFEF	1.a
2022-23	Bigarren maila	12.a	2. itzulia
2023-24	Bigarren maila	7.a	1. itzulia

• Espainiako futbol ligako lehen maila: 0

bigarren 1930-31 denboraldian.

• Espainiako futbol ligako bigarren maila: 2

1949-50 eta 1959-60

• 1. maila RFEF: 1

2022

• Federazioaren Kopa: 1

1998-99 (Racing B taldea)

• Kantabriako Txapelketa: 13

1923, 1924, 1925, 1926, 1927, 1928, 1929, 1930, 1931, 1933, 1934, 1939 eta 1940

• Txapelketa probintziala: 4

1914, 1915, 1916 y 1917

• (Gaztelaniaz) Taldearen webgune ofiziala

2023-24 denboraldiko Espainiako Futbol Ligako Bigarren Mailako taldeak
Albacete | Alcorcón | Amorebieta | Andorra | Burgos | Cartagena | Eibar | Eldense | Elx | Espanyol | Huesca | Leganés Levante | Mirandés | Oviedo | Racing Ferrol | Racing Santander | Sporting Gijón | Tenerife | Valladolid | Villarreal B | Zaragoza