Anakronismo

Anakronismo laŭ PIV estas 1 Kronologia eraro, per kiu oni konfuzas inter si malsamdatajn historiaĵojn, kaj 2 Afero ne konforma kun la kutimoj aŭ moroj de la koncerna epoko.^[2]

Anakronismo aŭ anaĥronismo (el la greka ἀνά ana, "kontraŭ" kaj χρόνος ĥronos, "tempo") estas kronologia malkongruo en iu aranĝo, speciale kunigo de personoj, okazaĵoj, objektoj aŭ kutimoj el diferencaj tempoperiodoj. La plej ofta tipo de anakronismo estas objekto mismetita en tempo, sed ĝi povas esti ankaŭ parola esprimo, teknologio, filozofia ideo, muzika stilo, materialo, planto aŭ animalo, kutimo, aŭ io ajn asocia kun partikulara periodo en tempo kiu estas metita ekster sia propra tempa nivelo.

Anakronismo povas esti ĉu intenca aŭ neintenca. Intencaj anakronismoj povas esti enmetiaj en literatura aŭ arta verko por helpi nuntempan publikon engaĝiĝi pli prete en historia periodo. Anakronismo povas ankaŭ esti uzata por celoj de retoriko, komedio, aŭ frapo. Neintencaj anakronismoj povas okazi kiam verkisto, artisto aŭ ludanto ne konscias pri diferencoj en teknologio, lingvo, kutimoj, sintenoj aŭ modoj inter diferencaj historiaj epokoj. Tiuokaze anakronismo povas montri malbonan kvaliton en difinita verko, ekzemple se temi pri intencita serioza historia studo aŭ eĉ historia romano. En diversaj konvencioj anakronismoj necesas kaj estas universale akceptitaj, ekzemple en kino (kaj plej ofte en literaturo), kiam temas pri historiaj filmoj: la lingvaĵo (kaj eĉ la lingvo mem) plej ofte ne estas tiu de la reprezentita epoko kaj loko, sed de la nuntempa publiko, kiu devas kompreni la diraĵojn.