Il cerchio di sangue
|
C'l artìcul chè 'l è scrit in
Miranduléś |
 Berserk!
| ||
| Il cerchio di sangue | ||
 La Geeson, Hardin la Crawford e la Dors in na figùra dal film | ||
| Al sérć ad sangṿ 1967 | ||
|---|---|---|
| Regìa: Jim O'Connolly | ||
| Scritōr: Aben Kandel • Herman Cohen | ||
| Atōr: Joan Crawford • Ty Hardin • Diana Dors Michael Gough • Judy Geeson • Robert Hardy Geoffrey Keen • Sydney Tafler • George Claydon Philip Madoc • Ambrosine Phillpotts • Ted Lune | ||
| Müsica: John Scott | ||
| Léngua: ingléś | ||
| Dürä dal film: 96 minüt | ||
| Nasiōṅ: Régn Unî | ||
Il cerchio di sangue (Al sérć ad sangṿ) 'l è 'n film thriller ingléś dal 1967 ad Jim O'Connolly, la penùltm' òpra dla Joan Crawford in na pelìcula prima 'd murìr. 'L è stâ girâ in Inghiltèra c'n al cuntribùt dal cîrc The Billy Smart Circus.
In dla part dl’Angela Herman Cohen 'l arév vlû tōr pròpria la Christina Crawford ma sò màdar l'à dit ad nò. 'L à muciâ sù dimóndi in dl'Amèrica dal Nòrd e 'l à purtâ a cà da piò ad tri migliòṅ ad dòlar in tut al mónd. In cla manéra chè al film 'l è dvintâ al più gròs sucès cumersiàł ad Cohen.
Sunt
Da quànd sò marè acròbata 'l è mòrt in 'n incidènt mént'r al s śibìva in pùblic, la Monica Rivers (Joan Crawford) la pòrta avànti lē 'l cîrc ad famìja insém a 'l sò sòci, e pò amànt, Albert Dorando (Michael Gough). Fra i dū però al ròbi i n vànan minga tant bèṅ e difàti 'l óm al vrév mulàr incòsa e ciapàr la sò part. Un dè però a sucéd na daśgràsia parchè a gh mòla la lasa durànt al nùmar dal trapesìsta Gaspar (Thomas Cimarro) che, cascànd śò, al mōr impicâ.
La Monica la sènt udōr ad bèsi e la và avànti listés parchè la gint adès la riva 'd cursa par véd'r al sò spetàcul. A 'l pòst ad Gaspar la tōś un canadéś incóra più braṿ ch'l è bòṅ ad giràr su la lasa tiràda cun gl'òć quaciâ, Frank Hawkins (Ty Hardin), òṅ ch'in dal sò paéś 'l iva cupâ un tisi ma par difénd'r-as, acsè i aṅ stablî i giùdas. Chi lò al taca anc na relasiòṅ cun la padròna dal cîrc pròpria méntar Dorando al vèṅ masâ lasànd-ag camp lìbar. I àtar mémbar dal cîrc, al nâṅ Bruno Fontana (George Claydon), la dóna cun la barba ciamàda Rosy (Golda Casimir), 'l òm schèltar (Ted Lune), 'l óm fursû (Milton Reid), la sigàgna ch'la lèś la bòcia 'd cristàl (Miki Iveria), 'l óm ch'al taja in dū cal dóni Lazlo (Philip Madoc) e la sò muróśa Matilda (Diana Dors), 'l óm ch'al tira i curtèi Gustavo (Peter Burton) e la sò jutànta Wanda (Marianne Stone) i tàc'n a 'vér paùra parchè i èṅ sicûr ch'a gh sia un sasèṅ in dal cîrc. La Matilda la và anc óltar dgénd ch'l'è stada pròpria la Monica a masàr Dorando ma anc Gaspar. La sgnōra Rivers la sènt incòsa e la diś a Lazlo ad far-la taśēr. Cla nòt lè la Matilda la và in dla roulotte ad Frank par far sès sèg dgénd che Lazlo a lèt 'l è bòṅ sōl a durmìr ma 'l canadéś al la casa fóra e pò al dmanda a la Monica ad tōr al pòst ad Dorando cuma sòci e cuma amànt.
La pulisìa ad Scotland Yard la decìd ad mandàr-'g un sò óm p'r andàr-'g a fónd, al detective Brooks (Robert Hardy). Méntar lò al fà dal dmandi a la sgnōra Rivers, a tórna da 'l culéǵ in du l'éra stada malvluntéra sò fiōla Angela (Judy Geeson) ch'la decìd ad lauràr c'n al tiradōr ad curèi Gustavo parchè la Wanda l'è n'imbariagòsa. Cla sira lè, durànt un spetàcul, a mōr anc la Matilda, śgada in dū parchè qualchidòṅ 'l iva śbragâ al mecanìśum ch'al gh'iva da far-la andàr śò par salvàr-la méntar la séga lètrica la gh pasàva insìma. La Monica la n in pōl piò e la vrév vénd'r incòsa.