Aida Lafuente

Fía de Gustavo de la Fuente, pintor de cartelos y decorados pal Teatru Campoamor y de Jesusa Penaos. Aida Lafuente formóse políticamente nuna familia de comunistes (so padre fuere fundador del Partíu Comunista n'Uviéu, y los sos hermanos militaben nes mocedaes), Aida yera una figura conocida nel movimientu xuvenil d'Uviéu en 1934.

El testimoniu d'Alejandro Valdés asitiala los díes 7 y 8 d'ochobre collaborando nel hospital como enfermera. Otros autores falen del so llabor na organización de les cocines coleutives que se montaron na periferia d'Uviéu p'abastecer a los combatientes, a los que llevaba café y comida a la primer llinia.

Mientres l'ofensiva del exércitu de la república el día 13 d'ochobre, Aida actúa como enllaz ente'l Comité Revolucionariu d'Uviéu y los grupos que se caltienen nel oeste de la ciudá.

Cayida na ilesia de San Pedro de los Arcos d'Uviéu pola 21ª Compañía comandada pol teniente coronel Juan Yagüe cuando sólo tenía 19 años, nesos momentos defendía cuasi en solitariu con una ametralladora la entrada a la ciudá escontra les tropes lexonaries del xeneral Franco, superiores en númberu y fuercia, durante la Revolución Asturiana de 1934. Había dos ñeros d'ametralladora, el primeru foi silenciáu poles tropes de la compañía númberu 24. La segunda ametralladora, la d'Aida, llogró detenelos varies hores. El teniente coronel Juan Yagüe ordena nesi momentu al comandante de los escuadrones de sables avanzar cara al tarrén comprendíu ente l'anguaño avenida de los monumentos y la ilesia de San Pedro, d'esta forma dexa ente dos fueos la posición que defendía Aida, la 23ª compañía de la Lexón progresa a la vegada y, cola aída de la Caballería, penetra na cota, pese a los disparos que siguen saliendo de l'ametralladora, la 21ª compañía avanza pola zona de la estación del norte y llega tamién a la posición de la xoven comunista, alcontrándola muerta xunta otros combatientes, el restu de los compañeros repliégase pa la zona de L'Argañosa, perdiendo la posición. Según rellatos de la época alcontrárenla con un vistíu mancháu de pólvora con un compañeru, tamién muertu, al so llau. El calabre d'Aida de la Fuente foi alcontráu na fuexa coleutiva que se cavó xunta una tapia de la ilesia de San Pedro de Los Arcos.

Por estos fechos, Aida Lafuente pasó a la historia como símbolu de les ganes revolucionaries de la mocedá asturiana. Hai abondos poemes y cantares dedicaos a la so memoria, ente les que cabe destacar la versión del tema popular fecha pol grupu Nuberu. Nel llugar onde cayó hai una estatua recordando la so xesta.

Cunta la lleenda que, al ser increpada polos sos admiraos atacantes "¿Tú cómo te llamas, niña?", la so rempuesta foi "¡Comunista libertaria!". Tales, al paecer, fueron les sos últimes pallabres.^{[ensin referencies]}

•   Wikimedia Commons acueye conteníu multimedia sobre Aida Lafuente.
• Aida Lafuente na páxina del coleutivu editorial Glayiu Archiváu 2007-03-11 en Wayback Machine