Charlie Kaufman

Kaufman ñació nuna familia xudía na ciudá de Nueva York. Entamó la so carrera en televisión escribiendo dos episodios pa Get a Life de Chris Eliott, asina como una docena d'otros episodios pa programes como Ned y Stacey y The Dana Carvey Show.

Tuvo reconocencia per primer vegada al escribir Being John Malkovich, película que-y valió una nominación al Óscar y un premiu BAFTA. Tamién escribió Human nature, que foi dirixida por Michel Gondry, y llueu trabayó con Spike Jonze otra vegada como l'escritor pa El lladrón d'orquídees (Adaptation), que-y valió otra nominación al Óscar y el so segundu BAFTA. En dicha película presentábase a un personax, Charlie Kaufman, que resultaba ser una versión bastante irreal del escritor. Na vida real nun tien un hermanu ximielgu idénticu, ta casáu y abegosamente pudo esperimentar el drama fantásticu de la hestoria.

Tamién escribió Confessions of a Dangerous Mind, un retratu biográficu de Chuck Barris, un conductor d'un programa de concursos del que se pensaba yera un home clave de la CIA. Foi dirixida por George Clooney, que debutaba como direutor. Kaufman, mui molestu, criticó a Clooney por facer alteraciones dramátiques al guión de la película ensin siquiera consultá-ylo. El guionista afirmó nuna entrevista con William Arnold: «Lo usual pa un escritor ye entregar un guión y llueu desapaecer. Pero eso nun ye pa min. Quiero tar involucráu d'entamu a fin. Y estos direutores (Gondry, Jonze) sábenlo y respétenlo».

Depués llegó Eternal sunshine of the spotless mind (¡Escaezte de min!),la so segunda película col direutor Michel Gondry, pol que recibió'l so primer premiu Óscar al meyor guión orixinal, el so tercer BAFTA y el prestixosu PEN American Center 2005.

Un patrón interesante nos trabayos de Kaufman ye que de vezu céntrense nun protagonista masculín introvertíu, dalgo timíu, y una figura dominante femenina. Esto asocede con Eternal sunshine... (Joel/Clementine), El lladrón d'orquídees (Charlie), y Being John Malkovich (Craig/Maxine).

Vive en Pasadena, California.

• Being John Malkovich (Being John Malkovich) (1999), dirixida por Spike Jonze.
• Human nature (2001), dirixida por Michel Gondry.
• El lladrón d'orquídees (Adaptation) (2002), dirixida por Spike Jonze
• Confessions of a Dangerous Mind (Confessions of a dangerous mind) (2002), dirixida por George Clooney.
• Eternal sunshine of the spotless mind ("¡Escaezte de min!") (2004), dirixida por Michel Gondry.

• (n'inglés) Charlie Kaufman n'Internet Movie Database
• (n'inglés) Cómo ser Charlie Kaufman