Unión de Republicas Socialistas Sovieticas

Unión de Republicas Socialistas Sovieticas Союз Советских Социалистических Республик
← ← ← ← 1922 — 1991 → → → → →
Lema nacional: Пролетарии всех стран, соединяйтесь! (Proletarii vsiej stran, soiediniaities'!) (Ruso: Proletarios de toz os países, unir-tos!)
Himno nacional: A Internacional (1922-1944) Himno d'a Unión Sovietica (1944-1991)
Capital	Moscú
Idioma oficial	No bi'n heba, ruso de facto
Gubierno	Estau socialista
• Constitución    - Declarata    - Reconoixida	30 d'aviento de 1922 1 de febrero de 1924
• Desaparición	25 d'aviento de 1991
Superficie  • 1991	22,402,200 km²
Población • 1991 est.      Densidat	293.047.571 hab. 13,1 hab/km²
Chentilicio	Sovietico/a[1]
Moneda	Rublo
Miembro de: ONU, Pacto de Varsovia

A Unión de Republicas Socialistas Sovieticas (URSS) (en ruso: Союз Советских Социалистических Республик (СССР), Soyuz Sovietskij Sotsialistichieskij Riespublik (SSSR)), mas conoixida como Unión Sovietica (Советский Союз, Sovietskii Soyuz) estió un estau socialista que existió mientres gran parti d'o sieglo XX, dende o trunfo d'os comunistas en a guerra civil que siguió a la Revolución Rusa, en 1922 dica la suya desaparición mientres o gubierno de Mikhail Gorbachev en 1991. Establida dimpués de l'asasinato d'o zaguer zar, s'estendilló dende la mar Baltica y la mar Negra en Europa dica l'oceano Pacifico en Asia, con una superficie parellana a la d'antigo Imperio Ruso. Se tractaba d'un estau federal integrau en primerias nomás que por 4 republicas federadas (Rusia, Transcaucasia, Ucraína y Belarrusia), pero en as suyas zagueras anyadas yera formada por un total de 15 republicas socialistas sovieticas, ya que o suyo numero y grandaria heba variau dende 1922. Rusia yera a republica mas gran d'a Unión, tanto en superficie como en población, y dominaba politicament y economica lo conchunto d'a URSS. A suya vida politica estió marcada por o predominio absoluto d'o comunismo, con un rechimen politico monopartidista dominau por o Kommunistíchieskaya pártiya Soviétskogo Soyuza (o Partiu Comunista d'a Unión Sovietica) dica la disolución d'a URSS. D'atra man, mientres a suya existencia la Unión de Republicas Socialistas Sovieticas estió lo país d'Europa con mayor numero d'habitants y lo tercero d'o mundo por a suya población. A suya capital se trobaba en a ciudat de Moscú (l'actual capital de Rusia), en destacando por o suyo numero d'habitants atras ciudaz como Leningrado, Kiev, Tashkent u Bacú.

A Unión de Republicas Socialistas Sovieticas prencipió la suya existencia como estau en l'anyo 1922 como continación de l'antigo Imperio Ruso en un proceso impulsau por Lenin ta consolidar as institucions naixidas con a Revolución Rusa y refirmadas con a victoria de l'Exercito Royo en a Guerra Civil Rusa en luita contra las potencias occidentals, contra los contrarios a la revolución y tamién contra bels nacionalismos perifericos en bellas d'as republicas que s'heban proclamau independients en esboldregar-se l'Imperio Ruso. Mientres a suya existencia estió lo centro que toz os comunistas d'o mundo consideraban como l'exponent maximo d'a suya ideolochía politica, estando lo primer estau socialista d'o mundo. Mientres as suyas primeras anyadas, o nuevo estau remató con a intervención de tercers países en o suyo territorio, y dimpués d'a muerte de Lenin en 1922 o suyo succesor, Stalin, controló ferriament cualsiquier esbarre d'a doctrina politica oficial, desembolicando amás un proceso d'industrialización d'a economía d'o país completau con un proceso de colectivización de l'agricultura, tenendo como consecuencia un gran abance economico encara que tamién un periodo inicial en primerías d'os anyos 1930 en que s'escaicioron crisis de subsistencia con una población afamada. En a segunda metat d'os anyos 1930, o gubierno de Stalin desembolicó un sistema represivo con a clamada "Gran Purga" contra enemigos reals u imachinarios, con o resultau d'un elevau numero de muertes, chent engarcholada y lo desembolique d'un sistema de campos de concentración clamau "gulag".

Con a Segunda Guerra Mundial, Stalin en primeras prebó de combatir contra lo nazismo y la suya expansión en Europa Central con a ocupación de Checoslovaquia, pero dimpués d'os Pactos de Múnich entre Francia, lo Reino Uniu, o Tercer Reich y Italia, decidió fer alcuerdos con Hitler ta completar un reparto d'os territorios d'Europa oriental, mas que mas los perteneixients a Polonia, pero tamién la ocupación d'as republicas d'a mar Baltica (Lituania, Letonia y Estonia). Pero dimpués d'a Operación Barbarroya u invasión d'o país por os alemans, a URSS habió de luitar por a suya propia supervivencia como estau y como nación frent d'o Tercer Reich (con 27 millons de victimas d'a guerra, la Unión Sovietica estió lo país aliau con un numero mas elevau de victimas) plegando las tropas alemanas dica las mesmas puertas d'a ciudat de Moscú en l'hibierno de 1941 y en as puertas de Leningrado ixe mesmo anyo y de Stalingrado en 1942, y con a suya victoria en a guerra chunto con os Aliaus enampló la suya aria d'influyencia en Europa Central en os países que heba ocupau l'Exercito Royo en o suyo abance enta Europa Central: Estonia (incorporada a la URSS), Letonia (tamién incorporada), Lituania (tamién incorporada), Rumanía (que cedió la Besarabia a la URSS), Bulgaria, Yugoslavia, Albania, Hongría, Checoslovaquia (que tamién li cedió una chicota parte d'a Rutenia) y Polonia (que li cedió una part important d'o suyo territorio anterior a la guerra), amás como s'ha indicau de territorios anteriorment perteneixents a Alemanya, Rumanía, Polonia y Checoslovaquia, amás tamién de mantener mientres bels anyos una zona d'ocupación en Austria y una atra en Alemanya (que posteriorment se convertió en a Republica Democratica Alemana). Toz ixos países (menos Albania y Yugoslavia) conformoron una alianza militar clamada "Pacto de Varsovia" frent de l'alianza liderada por os Estaus Unius a travíés d'a Organización d'o Tractau de l'Atlantico Norte.

Posteriorment o suyo refirme a Mao Zedong aduyó a la victoria d'o comunismo en China, encara que en anyos posteriors toz dos países no compartiban posicions politicas. Mientres a Guerra Fría que la URSS mantenió con os Estaus Unius y los suyos aliaus d'a Organización d'o Tractau de l'Atlantico Norte una constant pugna; asinas, mientres a Guerra Fría s'escaicioron bellas crisis politicas contra los países d'o bloque occidental, en destacando la clamada crisi d'os misils en Cuba, cuan o gubierno de Fidel Castro, aliau d'a URSS, establió bases de lanzamiento de misils en o suyo territorio y lo gubierno estausunidense declaró un bloqueyo d'o país, con o risque de que se desencadenase una guerra nucleyar entre lo que ya yeran dos superpotencias y los suyos respctivos aliaus. Atros elementos de gran tensión estioron a guerra de Corea, a guerra de Vietnam y la invasión sovietica d'Afganistán, a on cadaguna d'as dos grans superpotencias prebó de fer una guerra de desgaste contra l'atra.

Ista situación de guerra no declarada entre toz dos bloques no remató que dica finals d'os anyos 1980 con o gubierno de Mikhail Gorbachev, cuan s'ubrió un periodo de distensión entre éls, dica que lo 25 d'aviento de 1991 s'escaició la disolución d'a Unión Sovietica, convertendo-se asinas as antigas republicas sovieticas en nuevos estaus independients y reconoixius como tals por a comunidat internacional: Rusia (lo país mas gran y succesor "de facto" d'a URSS), Estonia, Letonia, Lituania, Belarrusia, Ucraína, Cheorchia, Armenia, Azerbaichán, Cazaquistán, Moldavia, Kirguizistán, Tachiquistán, Turkmenistán y Uzbekistán.

O nombre d'o estau incluye cuatre elementos: unión, republica, socialista y sovietica.

En primeras incluye lo sustantivo "unión", en estar referiu lo nombre d'o país a una "unión" u conchunto d'elementos similars u con caracteristicas homochenias. O segundo elemento, "republica" fa referencia a que ixa unión se fa a partir de territorios que comparten a caracteristica común d'estar republicas; o tercer elemento ye un adchectivo, "socialista", que fa referencia a lo feito que ixas republicas poseyen amás a caracteristica común d'estar conformadas por a doctrina politica d'o socialismo: finalment, o segundo adchectivo común a ixas republicas socialistas ye "sovietico", que s'analizará a continación con mas detenimiento.

A palabra "sovietico" deriva d'o ruso "sovet" (en alfabeto cirilico "совет"), con o significau de "concello" u "asamblea", y que tien o suyo orichen en a radiz en protoeslau "vět-iti" ("informar"), relacionau con "věst" ("noticia"), d'a on deriva "sovietnik" con o significau de "concellero". En a tradición historico-politica rusa ya existioron d'antes mas bellas institucions con ixe nombre; asinas mientres l'Imperio Ruso o Concello d'Estau designaba a lo concello de ministros y recibiba lo nombre en ruso de "Госуда́рственный сове́т" (ɡəsʊˈdarstvʲɪn(ː)ɨj sɐˈvʲet).^[2]

Tanimientres, os "soviets" con o sentiu de concellos obreros amaneixioron mientres a revolución rusa de 1905.^[3] Encara que bien luego istos concellos fuoron reprimius por l'exercito ruso zarista, con a Revolución de Febrero de 1917 se debantoron consellos u "soviets" de treballadors y soldaus estandillaus por todo lo Imerio Ruso, que compartioron "de facto" lo poder con o Gubierno Provisional Ruso dirichiu por Georgy Lvov y dimpués por Alexander Kerensky.^[3][4] Bien luego los bolcheviques dirichius por Vladímir Ilich Uliánov (Lenin) exichioron que todo lo poder estase transferiu a ixos "soierts" y obtenioron o refirme d'os treballadors y soldaus agrupaus en ixos mesmos soviets.^[5] Dimpués d'a Revolución d'Octubre, en a que s'escaició la conquiesta d'o poder a lo Gubierno Provisional por os bolcheviques en nombre d'os soviets,^[4][6] Lenin proclamó la formación d'a República Socialista Soviética de Rusia.^[7]

En l'anyo 1922, mientres a cuestión cheorchiana, Lenin fació una crida a las republicas nacionals sovieticas ta formar una unión mayor, a la que clamó Unión de Republicas Sovieticas d'Europa y Asia, en ruso y alfabeto cirilico Союз Советских Республик Европы и Азии, transliterau como ojuz Sovjetskih Respublik Evropy i Azii. En primeras Stalin no i yera conforme pero finalment l'acceptó, cambeando lo nombre d'a unión enta Unión de Republicas Socialistas Sovieticas, encara que todas as republicas que conformaban dita unión se clamaban sovieticas socialistas y no adoptoron a denominación de socialistas sovieticas que dica l'anyo 1936. Amás, en cuantos d'os idiomas d'as rechions d'a URSS l'emplego de soviet adaptau a lo suyo nombre se fació muito dimpués y en bel caso no plegó a fer-se mai, como ye lo caso d'a Republica Socialista Sovietica d'Ucraína (clamada Українська Радянська Соціалістична Республіка, ye decir, Ukrainska Radianska Sotsialistychna Respublika).

CCCP (en alfabeto latino SSSR) ye l'abreviadura d'o nombre en ruso d'o país, l'equivalent u cognato d'URSS, escrito en alfabeto cirilico. Tanimientres, en emplegar-se tan a sobén por as autoridaz sovieticas ixas siglas, por todo lo mundo se familiarizoron con o suyo significau, encara que en textos cultos escritos no s'emplega mai u cuasi mai en atros idiomas. En ruso tamién gosa fer-se servir como abreviadura Союз ССР (transliterau como Soyuz SSR), que traducida directament significa Unión de SSR) y como nombre curto u simplificau d'o país Советский Союз (transliterau como Sovjetskij Sojuz, con o significau d'Unión Sovietica). Dica la Segunda Guerra Mundial tamién s'usaba l'abreviadura CC como abreviadura de Советский Союз, pero se dixó d'usar en asociar-se en cirilico a l'equivalent de SS en alfabeto latino, que ye l'abreviadura común emplegada ta las Schutzstaffel d'o nazismo d'o Tercer Reich.

En os países occidentals se gosa emplegar en toz os idiomas como nombre d'o país o nombre simplificau d'Unión Sovietica u las siglas URSS, encara que en exercer sobre lo conchunto un claro dominio la Republica Socialista Sovietica de Rusia tamién gosaba (u gosa) fer-se servir Rusia, encara que propiament cal reservar ixa denominación ta l'actual estau creyau con a disolución d'a Unión Sovietica. Y por o mesmo motivo o chentilicio usau con mas frecuencia en todas as luengas ta denominar a los habitants d'a Unión Sovietica yera lo de rusos en cuentas de sovieticos, que ye lo mas apropiau, en un fenomeno equivalent a l'emplego d'o chentilicio angleses ta referir-se a los habitants d'o Reino Uniu en cuentas de britanicos, denominación mas adecuada en incluyir a escoceses, galeses y nortirlandeses u a l'emplego de nortamericanos ta referir-se a los estausunidenses, cuan en realidat nortamericanos en son tamién os groenlandeses, os canadienses y los mexicanos.

Se veiga tamién Historia de Rusia.

• Exercito Royo.
• Historia de Rusia.

• Se veigan as imáchens de Commons sobre a Unión Sovietica.
• Se veigan as imáchens de Commons sobre a Unión Sovietica.

Republicas d'a Unión Sovietica
	RSS d'Armenia | RSS d'Azerbaichán | RSS de Belarrusia | RSS de Cheorchia | RSS d'Estonia | RSS de Letonia | RSS de Lituania | RSS de Moldavia | RSS de Cazaquistán | RSS de Kirguizistán | RSSF de Rusia | RSS de Tachiquistán | RSS de Turkmenistán | RSS d'Ucraína | RSS d'Uzbekistán Republicas Sovieticas de curta vida: RSS Carelo-Finesa (1940-1956) | RSSF Transcaucasica (1922-1936)

	Ex Unión de Republicas Socialistas Sovieticas (URSS)
	Armenia | Azerbaichán | Belarrusia | Cazaquistán | Cheorchia | Estonia | Letonia | Lituania | Moldavia | Kirguizistán | Rusia | Tachiquistán | Turkmenistán | Ucraína | Uzbekistán

• Datos: Q15180
• Multimedia: Soviet Union / Q15180