Indonesia

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Republica d'Indonesia Republik Indonesia
(En detalle) (En detalle)
Lema nacional: Bhinneka Tunggal lka (Indonesio: Unidat en Diversidat)
Himno nacional: Indonesia Raya
Capital  • Población	Jakarta 321.883
Mayor ciudat	Jakarta
Idiomas oficials	Bahasa Indonesia
Forma de gubierno President	Republica Prabowo Subianto
Independencia Declarata Reconoixita	d'os Países Baixos 17 d'agosto, 1945 27 d'aviento, 1949
Superficie  • Total  • % augua	Posición 15º 1.904.569 km² 4,85%
Población  • Total  • Densidat	Posición 4º 255.461.700 124 hab/km²
PIB (PPA)  • Total (2007)  • PIB per capita	Posición 22º US$ 410.317 millons US$ 1.824
Moneda	Rupiah
Chentilicio	Indonesio/a
Zona horaria	UTC+7 a UTC+9
Dominio d'Internet	.id
Codigo telefonico	+62
Prefixo radiofonico	JZA-JZZ/PKA-POZ
Codigo ISO	ID / IDN / 360
Miembro de: ASEAN, OPEP,APEC, ONU

A Republica d'Indonesia (Republik Indonesia en indonesio ye un gran archipelago situato entre a penisula d'o Sudeste Asiatico y Australia, entre os oceanos Indico y Pacifico. Indonesia ye integrata por 17.508 islas que se pueden agrupar d'este a ueste en Sumatra y as islas d'a Sonda, Borneo, Celebes, as Molucas y Nueva Guinea. Con una población estimata de 255 millons d'habitants, ye o cuatreno país mas poblato d'o mundo y o mas poblato de mayoría musulmana. A capital ye Jakarta.

Indonesia ye un Estau tranconstinental. Tien mugas terrestres con Malaisia (a o norte d'a isla de Borneo), con Papua Nueva Guinea (a l'este d'a isla de Nueva Guinea) y con o Timor Oriental (a l'este d'a isla de Timor). A o norueste d'Indonesia, a isla de Sumatra ye deseparata d'a Malaisia continental por o estreito de Malaca; a o nord-este, tien amán d'a isla de Celebes y d'as Molucas a isla filipina de Mindanao, y a o norte de Nueva Guinea se troban os Estaus Federaus de Micronesia; a o sudeste i tien Australia. As mugas maritimas son a mar d'Andaman, a mar d'a China Meridional, a mar de Celebes, a mar d'as Molucas y l'oceano Pacifico a o norte; a mar d'Arafura y a mar de Timor a o sud, y l'oceano Indico a o sud y a l'ueste.

L'archipelago indonesio ha estau una rechión de comercio important dende o sieglo VI, cuan o Reino de Srivijava manteneba contactos comercials con a China y a India. Os gubernadors locals gradualment adoptoron os modelos culturals, relichiosos y politicos indios dende os primers sieglos dimpués de Cristo, y se i desembolicoron reinos hinduistas y budistas. Posteriorment, os mercaders musulmans i portioron o islam. As potencias europeas miroron de monopolizar o comercio con as islas mientres a Era d'os descubrimientos. Dimpués de tres sieglos de colonialismo neerlandés, Indonesia consiguió a suya independencia en rematar a Segunda Guerra Mundial. A economía d'o país creixió a escape mientres as decadas de 1980 y 1990 debito a l'abundancia de recursos naturals y o desembolique d'os sectors manufacturero y de servicios, encara que a pobreza y a desigualdat encara son un problema muit grieu.^[1] A crisi economica d'Asia de 1997 afectó grieument a Indonesia y produció cambeos politicos importants, como a dimisión d'o president Suharto que heba estau en o poder por mas de trenta anyos.

Indonesia ye integrata por diversos grupos etnicos, lingüisticos y relichiosos. Os javaneses son o grupo etnico mas gran y o mas influyent politicament. Indonesia ha desembolicato una identidat cultural compartita basata en una luenga nacional, a diversidat etnica, o pluralismo relichioso -en que os musulmans son mayoría- y una historia de colonialismo y a rebelión contra iste. Con tot y con ixo, o separatismo de bels grupos ha producito confrontacions violentas y ha afectato a la estabilidat politica y economica.

Indonesia ye integrata por 17.508 islas, d'as que 6.000 son habitatas.^[2][3] As islas son situatas a o norte y a o sud d'a linia d'o ecuador. As mas grans son Java, Sumatra, Kalimantan (a sección indonesia de Borneo), Nueva Guinea (compartita con Papua Nueva Guinea), y Sulawesi. Indonèsia tien mugas terrestres politicas con Malaisia en as islas de Borneo y Sebatik, Papua Nueva Guinea en a isla de Nueva Guinea y Timor Oriental en a isla de Timor. A capital, Jakarta, ye en Java, y ye a ciudat mas gran d'a nación, seguita de Surabaya, Bandung, Medan y Semarang.^[4]

Con 1.904.569 kilometros cuadratos, Indonesia ye o 16^eno país mas gran d'o mundo en superficie^[5] A suya densidat de población ye de 134 personas por kilometro cuadrato, ocupando a 79^ena posición en o mundo,^[6] encara que Java, a isla mas poblata d'o mundo,^[7] tien una densidat poblacional de 940 personas por kilometro cuadrato. Con 4.884 m, Puncak Java, en Papua, ye a tuca mas alta d'Indonesia, y o laco Toba, en Sumatra, ye o laco mas gran con una superficie de 1.145 kilometros cuadratos. Os ríos mas luengos d'o país son en Kalimantan, entre os que se troban, o Mahakam y o Barito; ditos ríos son os enlaces de comunicación y transporte entre os diversos asentamientos en as suyas riberas.^[8]

Por a localización d'Indonesia en os estremos d'as placas tectonicas pacifica, eurasiatica y australiana bi ha a-saber-los volcans y os tierratremos i son frecuents. Indonesia tien a o menos 150 volcans activos,^[9] incluyindo-ie o Krakatoa y o Tambora, o dos conoixitos por as suyas devastadoras erupcions en o sieglo XIX. A erupción d'o supervolcán de Toba, fa alto u baixo 70.000 anyos, estió una d'as erupcions mas grans y una catastrofe global, seguntes bellas teorias. As cenisas volcanicas son un d'os contribuyents mas importants a la fertilidat agricola o que fa que haiga habito historicament grans densidaz poblacionals en Java y Bali.^[10]

Situato sobre o ecuador, Indonesia tien un clima tropical con dos estacions monzonicas humeda y xuta. A precipitación anyal meyana en as tierras baixas varía entre 1.780 a 3.175 mm, y ye de 6.100 mm en as rechions montanyosas. As arias montanyosas, en particular a costa occidental de Sumatra, Java Oriental, Kalimantan, Sulawesi y Papua reciben a mayor cantidat de precipitación. A humedat ye relativament alta, con una meyana d'o 80%. As temperaturas varían poco a lo largo de l'anyo.

Debito a la suya extensión, clima y cheografía, Indonesia ocupa a segunda posición en biodiversidat d'o mundo;^[11] a suya flora y fauna son una combinación entre as especies asiaticas y australianas.^[12]

Indonesia ye dividida en administrativament en 38 provincias (Provinsi), cadaguna d'ellas con a suya propia lechislatura y gubernador. As provincias se componen de rechencias (kabupaten) y ciudaz (kota). As rechencias y ciudaz, mesmo que las provincias, tienen os suyos propios gubiernos locals y organos parlamentarios. A la vegada, as rechencias y ciudaz se subdividen en subdistrictos ditos kecamatan y en lugars, clamaus desa u kelurahan.

Finalment, bi ha cinco d'as 38 provincias que poseyen un rechimen especial dotau d'una autonomía mas ampla, y que son as siguients: Aceh, Jakarta, Yogyakarta, Papua y Papua de l'Ueste.

Os esportes mes populars son o badminton, o fútbol, y atros esportes tradicionals com o sepaktakraw y l'artes marcials indonesias ditas Pencak Silat.

• Indonesia en os Chuegos Olimpicos.

Indonesia participa en os Chuegos Olimpicos de verano dende os chuegos de Helsinki 1952, conseguindo dica Pekín 2008 un total de 25 medallas (6 d'oro, 9 d'archent y 10 de bronce).^[13][14]