Die Drizäh Alten Ort
(Witergleitet vun Die Dreizehn Alten Orte)
Die Drizäh Alten Ort si sälli Kantön vo der Schwiiz gsi, wo vo 1513, em Johr vom Biidritt vo Appezäll, bis 1798, em Afang vo der Helvetik, die Alti Eidgenosseschaft bildet hai.
Die drizäh Ort si gsi: (D Reihefolg entspricht der draditionelle Zellig. In Chlammere d Johreszahl vom Biidritt.)
Land Uri (1291)
Land Schwyz (1291)
Land Underwalde (Ob- und Nidwalde) (1291)
Stadt Luzärn (1332)
Stadt Züri (1351)
Stadt und Land Zug (1352)
Stadt und Republik Bärn (1353)
Land Glarus (1352/86)
Stadt Solodurn (1481), sit 1353 Zuegwandte Ort
Stadt Freiburg (1481), sit 1454 Zuegwandte Ort
Stadt Schaffhuuse (1501), sit 1454 Zuegewandte Ort
Stadt Basel (1501)
Land Appezäll (1513), sit 1411 Zuegwandte Ort
Nit mitzehlt si sälli Deil vo der Eidgenosseschaft, wo nit gliichberächtigt gsi si, nämlig die zuegwandten Ort, d Unterdanegebiet vo de einzelne Ort und die gemeine Herrschafte.