Marthe Keller

D Marthe Keller (* 28. Jänner 1945 z Basel) isch e Schwyzer Schauspiileri.

D Keller het ab 1953 e Danzuusbildig gmacht un anne 1962 irr Debüt as Dänzeri am Stadttheater Basel gee. Z Minche het si Schauspiil gleert un isch derno z Haidelberch un am Schillertheater z Berlin ufdrätte.

Noch e baar Rolle im dytsche Fäärnsee het si iri Filmkarriere z Frankryych unter dr Reschy vum Philippe de Broca un an dyr Syte vum Yves Montand in Pack den Tiger schnell am Schwanz (1969) aagfange. In Wenn Marie nur nicht so launisch wär’ (1970) het si iri eerscht Hauptroll gspiilt. Dernääbe het in als fuurt in Theaterprodukzioone mitgwiirkt.

Anne 1975 het si Frankryych verloo un isch uf Hollywood gange. 1976 het si an dr Syte vum Dustin Hoffman in Der Marathon-Mann gspiilt, wu si ne Nominierig fir e Golden Globe as beschti Nääbedaarstelleri derfiir iberchuu het. In Schwarzer Sonntag (1977) vum John Frankenheimer het si ne Terrorischti gspiilt, in Fedora vum Billy Wilder e Filmdiva, wu zrugzooge läbt un fir e neie Fil soll gwunne wääre. No andere Rolle z Hollywood, unter anderem an dr Syte vum Al Pacino in Bobby Deerfield (1977) un in Die Formel mit em Marlon Brando, het si syt dr 1980er Joor in dr Hauptsach Theater gspiilt, so u. a. vu 1983 bis 1986 d Buhlschaft im Jedermann näb em Klaus Maria Brandauer bi dr Salzburger Feschtspiil, derzue het si in Fäärnseeprodukzioone mitgwiirkt.

Anne 2001 isch si fir iri Roll vu dr Mme. Berthold in dr Broadway-Inszenierig vu Das Urteil von Nürnberg as beschti Schauspiileri fir dr US-amerikanisch Theaterbryys Tony nominiert gsii. 2006 het si dr Schwyzer Filmbryys as „Beschti Nääbedaarstelleri“ fir iri Roll in Fragile iberchuu.^[1][2][3] Syter 1999 het si au bi meerere Oopere Reschy gfiert. Aafangs 2012 isch d Marthe Keller vu dr franzeesische Regierig in Rang vun ere Ritteri vu dr franzeesische Eerelegioon glupft woore.^[4]

Anne 1971 isch ire Suun Alexandre uff d Wält chuu, sy Vater isch dr Philippe de Broca gsii.

• Thomas Blubacher: Marthe Keller. In: Andreas Kotte (Hrsg.): Theaterlexikon der Schweiz. Band 2. Chronos, Zürich 2005, ISBN 3-0340-0715-9, S. 981.

 Commons: Marthe Keller – Sammlig vo Multimediadateie

• Marthe Keller in dr Internet Movie Database
• Marthe Keller bi filmportal.de

1. ↑ SWISS FILMS: Fragile. Abgruefen am 27. Oktober 2019. 
2. ↑ Schweizer Filmpreis an "Mein Name ist Eugen". In: Swissinfo. 18. Januar 2006, abgruefen am 27. Oktober 2019. 
3. ↑ Stefan Brändle: Marthe Keller: «Ich habe mich immer mehr versteckt als gezeigt». In: Aargauer Zeitung. Abgruefen am 27. Oktober 2019. 
4. ↑ Marthe Keller promue chevalier de la Légion d’honneur bi letemps.ch, 2. Jänner 2012

Dä Artikel basiert uff ere fräie Übersetzig vu dere Version vum Artikel „Marthe_Keller“ vu de dütsche Wikipedia. E Liste vu de Autore un Versione isch do z finde.