Jean Georges Baer

Dr Jean Georges Baer, wo am 12. Februar 1902 z London uf d Wält cho und am 21. Februar 1975 z Nöieburg gstorben isch, isch e Schwiizer Zooloog und Umwältaktivischt gsi.

Er het z Nöieburg, z Gämf un z Paris Naturwüsseschafte studiert und isch spöter für viili Joor a dr Uni Nöieburg Profässer für Zoology gsi. 1949 isch er für zwöi Joor dr Uni iire Räkter worde. 1972 isch sini Emeritierig gsi.

S Spezialfach, won er bsunders vil drfüür gforschet het, isch d Läbenswys vo de Tierparasite. Bi de Nöieburger Zooloogen isch das sit em 19. Joorhundert en Forschigsschwärpunkt gsi, und em Baer syni Arbet i verschidene Regioone vo dr Wält het die Sach staarch fürsi brocht. Syni Samlig vo so chlyne Schmarotzer us em Tierrych ghört hüt em Naturmuseum Gämf.

Der Jean Georges Baer het au em Schwiizerische Nationalfonds ghulfe, und er isch als früenen und angaschierte Naturschützer dr Presidänt vo dr Schwiizerische Nationalparkkomissioon woorde. Me het dr Nöieburger uf dr ganze Wält bi Fachkongräss gseh, er isch internazional guet vernetzt gsi, und drum isch er denn dr Vizepresidänt vo dr Internationalen Union vo de nazionale Biologevereinigunge und von 1958 bis 1963 dr Presidänt vo dr Wältnaturschutzunion IUCN gsi. Er het ghulfe dr WWF uf d Bei stelle. Und d UNESCO het nen ins Galapagos-Komitee gwählt, wo füre Naturschutz uf de Galapagosinsle luegt.