Teti

Teti
Merienptah, Othoes
’n Sistrum (musiekinstrument) met Teti se naam op gegraveer.
Farao van die 6de Dinastie
Periode	2345–2333 v.C.
Voorganger	Oenas
Opvolger	Oeserkare
Monumente	Piramide van Teti
Teti in Egiptiese hiërogliewe
Serech of Horusnaam Nebty-naam Goue Horus-naam Praenomen of troonnaam Nomen of geboortenaam
Portaal    Antieke Egipte

Teti (ook bekend as Merienptah en Othoes) was die eerste Egiptiese farao van die 6de Dinastie van die Ou Ryk. Hy het 12 jaar lank regeer.

Teti het verskeie vroue gehad. Onder hulle is:

• Koningin Ipoet, waarskynlik die dogter van farao Oenas, die laaste koning van die 5de Dinastie. Sy was die ma van Pepi I.
• Koningin Choeit, wat die ma van Oeserkare kon gewees het.^[1]

Hy het ook verskeie kinders gehad, onder andere minstens drie seuns en moontlik tien dogters.^[2] Twee van die seuns was Pepi I en Oeserkare.

Tydens Teti se bewind het belangrike offisiere begin om grafmonumente te bou wat amper net so groot soos dié van die farao was. Sy raadgewer Mereroeka het ’n mastaba by Saqqara laat bou wat uit 33 ryklik versierde kamers bestaan het; dit was die grootste bekende grafkelder van enige Egiptiese edelman.^[3] Dit word beskou as ’n teken dat Egipte se rykdom verskuif het van die sentrale hof na die amptenare.

Volgens Manetho is Teti in ’n harem-sameswering deur sy paleiswagte doodgemaak, maar hy is dalk deur Oeserkare vermoor in ’n magsoorname. Hy is in sy piramide by Saqqara begrawe.

Teti se piramide het gladde sye en is die tweede bekende piramide met piramidetekste. Daar is ook drie satelliet-piramides en ’n dodetempel in die kompleks. Die piramide is in 1882 oopgemaak en van 1907 tot 1965 is uitgrawings daar gedoen. Die oorspronklike naam was "Teti se Plekke is Blywend". Die deel bo die grond is in ’n swak toestand en lyk nou soos ’n klein heuwel, maar die ondergrondse kamers en gange het goed bewaar gebly.

Koningin Sesjesjet was Teti se ma. Sy het ’n groot rol gespeel in sy troonbestyging en in die versoening van twee strydende partye in die koninklike familie.^[4] Die laaste piramide wat in Egipte ontdek is, in 2008, was vermoedelik hare. Die ontdekking is op 11 November 2008 bekend gemaak deur Zahi Hawass, sekretaris-generaal van die Egiptiese Opperraad van Oudhede.^[5] Dit is die volledigste satelliet-piramide by Saqqara en was aanvanlik 14 m hoog, met sye van 22 m lank.^[6][7]

• Die Suid-Saqqara-steen: Annale van die 6de Dinastie
• BBC, in foto's: Nuwe piramide ontdek
• Wikimedia Commons het meer media in die kategorie Teti.
• Hierdie artikel is vertaal uit die Engelse Wikipedia