Pous Johannes XV

Pous Johannes XV
Pontifikaat begin	Middel Augustus 985
Pontifikaat eindig	Einde Maart 996
Voorganger	Johannes XIV
Opvolger	Gregorius V
Gebore	Rome, Italië
Sterf	Einde Maart 996 Rome, Italië
Ander pouse genaamd Johannes

Johannes XV was die 137ste pous van die Rooms-Katolieke Kerk. Hierdie pous word soms as Johannes XVI of as Johannes XV (XVI) aangedui, hoewel hy die vyftiende pous met die naam Johannes was. Dit was Pous Johannes XXI wat die twintigste Johannes was, maar homself die 21ste genoem het, wat die verwarring veroorsaak het. As gevolg daarvan het Pous Johannes XX nooit bestaan nie.

Pous Johannes XV is gebore in Rome, Italië seun van 'n priester met die naam Leo. Voor sy verkiesing was hy kardinaal-priester van Sint Vitale. In Middel Augustus 985 volg hy Pous Johannes XIV op en regeer tot sy dood einde Maart 996. Hy word opgevolg deur Pous Gregorius V. Die naam ‘Johannes’ beteken 'God is genadig'.

Pous Johannes XV was die kandidaat van die Johannes Crescentius. Tydens sy pontifikaat het keiserin Theophano, weduwee van keiser Otto II en regentes vir haar seun Otto III in Rome gewoon en dit het Crescentius in toom gehou. Hy bemiddel tussen koning Ethelred II van Engeland en Richard I van Normandië. Die bemiddeling lei tot die Vrede van Rouen in 991.

Die pous was ydel en het hom skuldig gemaak aan nepotisme wat hom onbemind gemaak het by die bevolking. Hy het wel die hervormings van Cluny gesteun. Hy was die eerste pous wat iemand heilig verklaar het, nl. Ulrich van Ausburg op 31 Januarie 993.^[1]

Die pous het Pole as 'n geskenk ontvang van hertog Mieszko I omdat die hertog beskerming teen Duitsland en Boheme gesoek het..

Gedurende sy pontifikaat het Gallicanisme (die onafhanklikheid van die Franse Kerk van Rome) sy kop uit gesteek. Hugo Capet, was koning van Frankryk en het Arnulf aartsbiskop van Reims gemaak. Arnulf was egter die nefie van Charles van Lorraine, Hugo se aartsvyand. Charles het Reims verower en Arnulf gevange geneem. Hugo het Arnulf egter as 'n verraaier beskou en geëis dat Pous Johannes hom afset. Voordat die pous kon antwoord, het Hugo Reims verower en beide Charles en Arnulf gevange geneem. Hy het 'n sinode byeen geroep en die sinode het heel gehoorsaam Arnulf afgeset in Junie 991. Hulle kies ab Gerbert (die latere Pous Silvester III) as sy opvolger. Die pous het nie die gebeure goedgekeur nie en die Franse biskoppe opgeroep na 'n onafhanklike sinode in Aken (net buite Frankryk). Die biskoppe het geweier om te kom en toe Johannes hulle na Rome ontbied het hulle geprotesteer dat die pad te gevaarlik was en toestande in Rome nie gunstig was nie. Die pous stuur toe sy gesant met die opdrag om 'n sinode in Mousson te belê. Slegs die Duitse biskoppe het opgedaag en die Franse biskoppe is verhinder deur Hugo. Die sinode het egter besluit op 2 Junie 995 dat Arnulf se afsetting onwettig was. Na die dood van Hugo (23 Oktober 996) is Arnulf bevry en het sy pligte hervat. Gerbert het na die keiserlike hof in Magdeburg vertrek.

In 996 vertrek Otto III na Rome met die doel om as keiser gekroon te word nadat die pous hom gevra het om te kom help teen die Crescenzi.. Terwyl hy in Pavia Paasfees vier tot 12 April, sterf Johannes van koors einde Maart 996. Otto maak toe maar sy familielid Bruno pous onder die naam Pous Gregorius V.

• Duff, Eamon (2001). Saints and Sinners: A History of the Popes, Yale University Press. ISBN 0-300-09165-6
• Maxwell-Stuart, P. G. (2002). Chronicle of the Popes: The Reign-by-Reign Record of the Papacy from St. Peter to the Present, Thames & Hudson. ISBN 0-500-01798-0.

Die Engelse Wikisource bevat bronmateriaal oor hierdie onderwerp onder die titel:

Catholic Encyclopedia (1913)/Pope John XV (XVI)

• CE Inskrywing in die Catholic Encyclopedia (Engels)

• CF Inskrywing in die Catholic Forum (Engels)

• BBKL Inskrywing (met Literatuurverwysings) in die Biographisch-Bibliographisches Kirchenlexikon (Duits)
• PTA Inskrywing in "Popes through the Ages" deur J. Brusher S.J. (Engels)

• GM Inskrywing in die Genealogie van die Middeleeue (Duits)

Saamgestel en vertaal uit die Nederlandse, Engelse, Duitse en Franse wikipedia en aangevul uit ander bronne soos aangedui.