Caputh
 | Hierdie artikel is 'n weesbladsy. Dit is nie geskakel of in ander bladsye ingesluit nie. Help Wikipedia deur na moontlike teks te soek en 'n skakel hierheen te plaas. |
Caputh | |
|---|---|
Dorpsdeel | |
 Caputh se dorpstraat | |
 Wapen | |
  Caputh | |
| Koördinate: 52°20′38″N 12°59′19″O / 52.34389°N 12.98861°O | |
| Land |  Duitsland |
| Deelstaat | Brandenburg |
| Distrik | Potsdam-Mittelmark |
| Munisipaliteit | Schwielowsee |
| Eerste verwysing | 1317 |
| Oppervlak | |
| • Totaal | 12,46 km2 (4,81 vk. myl) |
| Hoogte | 46 m (151 ft) |
| Bevolking | |
| • Totaal | 4 596 |
| • Digtheid | 369/km2 (960/vk. myl) |
| Tydsone | UTC+1:00 (MET) |
| • Somertyd | UTC+2:00 (MEST) |
| Poskode | 14548 |
| Skakelkodes | 033209, 03327 |
Caputh [ka'pu:t] is 'n dorp in die munisipaliteit Schwielowsee in die administratiewe distrik Potsdam-Mittelmark (deelstaat Brandenburg, Duitsland).
Die eerste historiese verwysing na Caputh dateer uit die jaar 1317. Op 31 Desember 2002 het die selfstandige dorp Caputh met die buurdorpe Ferch en Geltow saamgesluit om die nuwe munisipaliteit Schwielowsee te vorm.
Caputh is suidwes van Potsdam aan die Schwielow- en Templin-mere geleë. Die Havelrivier vloei deur albei mere. Naas sy natuurskoon, wat veral by watersportentoesiaste en stappers gewild is, het die "bloeiseldorp" Caputh deur die Slot Caputh, sy dorpskerk en die somerhuis van Albert Einstein bekendheid verwerf. 'n Veerboot verbind Caputh met Geltow.
Geskiedenis
[wysig | wysig bron]Bronstydperk
[wysig | wysig bron]
'n Argeologiese vonds in die bosgebied Lienewitzer Forst ('n skat wat uit twee goue armringe, 'n beker wat van goue plate vervaardig is en gouddraadspirale bestaan het) verwys na handelsbetrekkinge met die oorsprongsgebied in die suidoostelike Sentraal-Europa.
Eerste historiese verwysing
[wysig | wysig bron]'n Oorkonde van Otto III van Brandenburg uit die jaar 1317 behels die eerste historiese verwysing na die dorp Caputh. Die Slawiese wortel van die dorpsnaam beteken vermoedelik "hoef" en beskryf die hoefysteragtige vorm van die Caputh-meer. Vanweë die klein oppervlakte van die landbougebied en die mere en bosse rondom die dorp het die boere hul veevoer en hooi vroeër uit die streek van Drewitz suidoos van Potsdam verkry. Die sogenaamde "Caputhse Hooiweg" herinner nog steeds aan hierdie tydperk.
Die inwoners van Caputh het nie oor visregte beskik nie. Hulle was werksaam as boswerkers, teerkokers en arbeiders in die steenfabrieke van die omgewing. In 1662 het die dorp 'n besitting van Philip de Chiese (Philippe de la Chièze) geword.
Kasteel Caputh
[wysig | wysig bron]
Die landgoed en kasteel was vanaf die 16de eeu in besit van die keurvorste. In 1608 is 'n jagkasteel opgerig. Die Groot Keurvors Friedrich Wilhelm het die landgoed in 1662 aan Philippe de la Chièze oorgelaat wat die Kasteel Caputh laat bou het - die enigste gebou van sy soort uit die vroeë Brandenburgse Baroktydperk wat tot vandag toe bewaar gebly het.
In 1671 het die kasteel en landgoed weer in keurvorstelike besit oorgegaan om as setel van keurvorstinne (of weduwees van keurvorste) en prinsesse te dien. Die kasteel is in 1673 uitgebrei en in 1687/94 van 'n nuwe meubilering en binnedekorasie voorsien. Op 8 Julie 1709 het drie vorste ter geleentheid van die sogenaamde Driekoningsbyeenkoms in die Kasteel Caputh vergader. Koning Friedrich Wilhelm I het in Caputh soms sy jagpartye gereël en omstreeks 1720 in die benedeverdieping 'n vloerteëlsaal met sowat 7 500 Hollandse fayencevloerteëls laat inrig.
Kort nadat die kasteel aan die von Thümen-gesin verkoop is, is die 17de eeuse kasteeltuin deur Peter Joseph Linné herontwerp. 1908 is die kasteel as 'n nalatenskap aan die von Willich-gesin oorgedra wat hier tot in die jaar 1945 gewoon het. Die suidwesvleuel van die kasteel het in 1908/09 ontstaan. In die DDR-tydperk het die kasteel 'n spesiale beroepskool vir fotograwe en blommerangskikkers gehuisves. Dit is ná die Duitse hereniging tussen 1995 en 1995 volledig gerestoureer.
