酵素

酵素（粵拼：haau1 sou3），學名叫酶，係指具有催化功能嘅蛋白質。

幾乎所有細胞新陳代謝都需要酶嘅參與，先至可以維持生命。當酶進行催化嗰陣，俾酶催化嘅叫做「受質」。受質通過酶嘅催化，會轉化成另一種分子。而酶係催化過程入面，係唔會被消耗嘅，也唔會影響反應嘅化學平衡。同其他無機催化劑唔同，酶具有高度嘅專一性，即係話只會催化特定嘅反應，或者產生特定嘅分子。目前已經知道可以俾酶催化嘅化學反應，有大約4000種。

幾乎所有細胞活動都會牽涉到酶，嚟提高效率。同其他無機催化劑一樣，酶通過降低化學反應嘅活化能嚟加快反應速率。大多數酶可以將催化反應速度提高到好百萬倍。

酶催化嘅活躍程度，係會受其他分子影響：

• 抑制劑係可以降低酶活性嘅分子；
• 活化劑則係可以增加酶活性嘅分子；

有好多藥物同毒藥就是酶嘅抑制劑。酶嘅活性仲可以俾溫度、化學環境（例如pH值）、受質濃度同埋電磁波（例如微波）等等好多因素所影響。

酶喺工業同埋日常生活亦都被廣泛應用。例如：

• 藥廠用特定嘅合成酶嚟合成抗生素
• 加酶洗衣粉通過分解蛋白質同脂肪，嚟幫助去除衣物上嘅污漬同油漬。