杜爾伯特

杜爾伯特（粵音：dou⁶ ji⁵ baak³ dak⁶；普通話拼音：Durbote；蒙古文：ᠳᠥᠷᠪᠡᠳ /，斯拉夫寫法：ДӨрбӨД，拉丁字寫法：Dorbod）係中國黑龍江省大慶市嘅蒙古族自治縣，叫杜爾伯特蒙古族自治縣，一般簡稱杜蒙縣。面積6176km²，人口25萬（2010年），郵政編碼166200。縣府駐泰康鎮。轄4個鎮、7個鄉、2個單位。

• 鎮：泰康鎮、胡吉吐莫鎮、煙筒屯鎮、他拉哈鎮
• 鄉：一心鄉、克爾臺鄉、白音諾勒鄉、敖林西伯鄉、巴彥查干鄉、腰新鄉、江灣鄉
• 單位：綠色草原牧場、大山種羊場

「杜爾」（拉丁蒙文：dor）喺蒙古文嘅意思係「四」。15世紀時成吉思汗嘅細佬哈布圖哈薩爾十六世孫愛納嘎帶住部族遊牧來嫩江一帶，見呢道水草豐美，就停咗喺道，因為佢哋嘅分牧次序係四，所以自稱爲杜爾伯特部，屬孛兒只斤氏^[1]。

1648年（清順治五年）喺蒙地搞盟旗制，於是呢度設杜爾伯特旗，屬哲里木盟。

1906年（光緒三十二年）二月，靠近中東鐵路安達站嘅地段歸咗安達廳。十月多耐站（而家東吐莫東南）設杜爾伯特沿江荒務行局，放時、和、年、豐四段荒地，後來成為泰來設治局轄地。1927年4月設泰康設治局，又放出民、康、物、阜四段荒地。因為吸引咗漢人移民，開始設縣，同時旗縣分治，改歸黑龍江省。

滿洲國時期，1933年10月1號泰康設治局改叫泰康縣，1934年歸龍江省，1940年泰康縣併入杜爾伯特旗。

1945年歸嫩江省，1946年4月旗縣又分置，泰康縣駐泰康鎮，旗駐巴彥査干，不過8月又廢咗個縣。

1956年10月10號旗撤換爲自治縣。

1. ↑ 有兩個杜爾伯特部，呢個係成吉思汗家族嘅，重有個喺外蒙西部嘅綽羅斯氏，據《蒙古秘史》，外蒙嗰個係成吉思汗十二世祖道布莫爾根嘅哥道蛙鎖呼爾嘅後裔，因為道蛙鎖呼爾生咗四粒仔，所以部落取四爲名，於是同呢個部落同名。

• 杜蒙縣政府