安達市

46°25′3″N 125°20′37″E / 46.41750°N 125.34361°E / 46.41750; 125.34361

  想搵1960年到1979年間嘅安達市，請睇大慶。

安達（粵拼：on1 daat6）係中華人民共和國黑龍江省綏化市嘅縣級市。面積3586km²^[4]，人口52萬（2010年）^[5]，其中市民有22萬。安達位於黑龍江西南部，地處松嫩平原腹地，係哈大齊工業走廊五個重要節點之一^[7]。經濟上，係黑龍江十強縣之一，喺中國亦係實力比較強嘅中小城市^[7][8]。佢嘅奶牛、肉牛業發達，有272萬畝草原，以亞洲東部特有嘅羊草爲主，係世界三大優質草場之一^[7][4]。

安達地方舊時係北方遊牧民族嘅遊牧地，「安達」呢個名係諧音自蒙古話嘅「諳達」，意思係「老友、夥記、無血緣嘅生死至交」（另外喺滿文有「賓客」意思^[7]）。安達市嘅駐地原名叫「諳達店」，整中東鐵路時呢度設個站，因為附近有諳達店，就諧音做「安達站」，後來呢個火車站吸引咗啲移民，逐漸發展成市鎮。設政區時以車站名做政區名。同時，「安達」嘅意思又有遞個講法，係話個車站起個噉嘅名係祈願「平安到達」、「安康順達」^[1][7]。

清朝時，呢度係蒙古杜爾伯特旗遊獵地。1961年，中東鐵路喺度設安達站。清光緒三十二年（1906年）正月，蒙屬杜爾伯特旗同黑龍江將軍屬地交界位設安達廳。廳署喺雙安鎮（而家任民鎮），屬黑龍江分巡道。

1913年2月，安達廳改為安達縣，初時係黑龍江省直轄，1914年6月改屬龍江道，直到1929年2月恢復爲省直轄。之後安達一路係省轄縣（1947年2月到9月期間屬黑嫩聯合省第三專區），不過轉屬過濱江省、松江省、嫩江省、黑龍江省。1956年3月5號，唔再由黑龍江省直轄，劃入嫩江專區。1960年5月12號，劃入松花江專區（呢個松花江專區改名自綏化專區，日後恢復咗綏化嘅名後，演變爲家下嘅綏化市）。

1960年5月26號，安達縣同肇州一部分合爲安達市，後來呢個安達市演變成而家嘅大慶市。1964年6月23號，由於石油開發，撤銷安達市，恢復安達縣（不過對外重宣稱做安達市），但個油區劃爲安達特區（呢個就係日後嘅大慶）。1965年3月27號，安達市同安達縣正式分離，呢陣時安達市同安達縣並存兼同級。1965年12月28號，安達市升爲地級市，脫離咗專區，並且喺1979年12月14號改名爲大慶市。而喺安達市改名大慶市嘅當年，7月16號，安達縣畀咗部分入安達市，去同佢市內嘅薩爾圖區嘅一部分合併爲安達市大同區。1984年11月17號，安達縣升為安達市。

安達轄3條街道、10個鎮、4個鄉、4個單位^[6]。

• 街道：鐵西街道、新興街道、安虹街道
• 鎮：安達鎮、任民鎮、萬寶山鎮、昌德鎮、昇平鎮、羊草鎮、老虎崗鎮、中本鎮、太平莊鎮、吉興崗鎮
• 鄉：火石山鄉、臥里屯鄉、青肯泡鄉、先源鄉
• 單位：安達畜牧場、原種場、紅旗泡水庫管理所、東湖水庫管理站

1. ↑ ^{1.0 1.1 1.2} 〈安達市歷史沿革〉。行政區劃網。2013年2月21號。喺2014年12月4號搵到。
2. ↑ 〈歷史文化〉。安達市人民政府。原著喺2013年7月29號歸檔。喺2014年12月4號搵到。
3. ↑ ^{3.0 3.1} 〈2013年政府工作報告〉。安達市人民政府。2013年4月10號。喺2014年12月4號搵到。{{cite web}}: CS1 maint: url-status (link)
4. ↑ ^{4.0 4.1 4.2} 〈自然環境〉。安達市人民政府。原著喺2013年7月29號歸檔。喺2014年12月4號搵到。
5. ↑ ^{5.0 5.1 5.2 5.3 5.4} 〈安達市概況地圖〉。行政區劃網。2013年2月21號。喺2014年12月4號搵到。
6. ↑ ^{6.0 6.1 6.2 6.3} 〈2013年統計用區劃代碼：安達市〉。中華人民共和國國家統計局。喺2014年12月4號搵到。
7. ↑ ^{7.0 7.1 7.2 7.3 7.4} 〈領導致辭〉。安達市人民政府。原著喺2014年8月3號歸檔。喺2014年12月5號搵到。
8. ↑ 〈發展目標〉。安達市人民政府。原著喺2013年7月29號歸檔。喺2014年12月5號搵到。