釙（粵拼：Pok3，Polonium）係元素嘅一種，佢嘅化學符號係Po，佢嘅原子序數係84，係銀白色嘅類金屬。瀝青鈾礦同錫石都有微量釙存在。
釙嘅化學性質同硒、硫類似，但帶有放射性。
釙響1898年由居里夫人同佢丈夫皮埃爾·居里發現。釙嘅拼音名係居里夫人紀念佢嘅故鄉波蘭（Polska）而改嘅。
已知釙有33個放射性同位素，由釙-188到釙-220。釙嘅最穩定同位素係釙-209（半衰期 103 年），釙-208（半衰期 2.9 年）同釙-210（半衰期 138.376 日）。
釙係所有元素中，一般公認係毒性最勁嘅。一個人暴露喺釙-210嘅α射線下嘅最大承受量係7pg（7×10-9g），而且釙會響體內係咁放出α射線破壞DNA。因為咁樣，啲人認為釙嘅α射線可能係搞到人生癌嘅原因。
