Kenneth Kaunda

Kaunda el xera el pi picenin de oto fioi. El xe nato a Lubwa, rente de Chinsali. So pare el xera on pastore protestante de la Cexa de Scozia (anglicani). Kaunda el ga studià al sentro politecnico de Munali. El s primo laoro el xe stà quelo de maestro inte le scole de Lubwa dal 1943 al 1945. Dopo verghe proà a entrar inte l’esercito e verghe laorà inte le miniere de rame a Bindura, Kaunda el xe diventà maestro a Mufulira.

En tel 1949, Kaunda el xe tornà a Lubwa do el ga insegnà fin al 1951. El xe diventà el prinsipale organisatore de el Congreso Africano Nasionale de la Rhodesia del Nord (ANC). Dopo do ani el xe stà eleto Segretario Nasionale de l’ANC, soto la presidensa de Harry Nkumbula. EL primo laoro el xe stà quelo de mobilitar la popolasion contro la Federasion de la Rhodesia e del Nyasaland. Dopo esar stà in prison par le so atività anticoloniali, Kaunda el se ga diviso da Mkumbula parché stò qua el xera pronto a vegnar a pati co i colonialisti. En tel 1959, Kaunda el xe stà condanà a nove mesi in prison par la so atività politega. Inte el fratempo altri partii nasionalsiti i xe stà creà in Zanbia. Al so ritorno in libertà (genaro 1960), Kaunda el xe stà eleto presidente de el Partio Unio par l’Indipendensa Nasional. En tel 1961, el ga organisà na canpagna de disobediensa popolare. En tel 1962, Kaunda el se sa presentà a le elesion aministrative. En tel 1964, a le elesion politighe nasionali, Kaunda el ga vinto e el xe diventà el primo ministro del governo transitorio e, a l’indipendensa del paexe el 24 otobre 1964, el primom presidente de lo Zanbia.

Co el Zanbia el xe diventà indinpendente, ghe xera solo che 109 zoeni che i gavea studià a l’università, e solo el 0,5% el gavea finio le scole medie. El sistema scolastico el xera el peso de l’Africa inglexe. El presidente Kaunda el ga subito spinto la scolarizasion e spinti i pi brai a studiar fin a l’università. L’Università de lo Zanbia la xe stà verta in tel 1966. En tel 1979, la sesion stacada de Kitwe la scominsià a funsionar. Kaunda el ga anca spinto par la creasion de scole tecniche. En tel canpo finansiario, Kaunda el ga dovù vedersela co le conpagnie foreste. La British South African Conpany fondada da Cecil Rhodes la gavea el controlo de el setore minerario. Kaunda el ga minacià la nasionalizasion de tute le conpagnie foreste se no le colaborava co el novo governo.

 

En te i primi ani setanta, el governo el ga preso el control de la majoria de le conpagnie foreste e tentà de atuare de i piani finansiari de svilupo par tuto el paexe. Purtropo, el preso del gregio el xe cresù mentre che el valor del rame – el pi inportante minerale scavà in Zanbia e el 95% de le esportasion del paexe – el xe diminuido. El governo nol xe stà bon de atuare i so piani. Invese de preparar de i piani de svilupo, el governo el s’à visto costreto a amnistrare la crisi econòmega, co el debito foresto che el creseva tuti i di. I problemi finansiari i xe continuadi par on toco e i portarà a la caduta del presidente in tel 1991.

Dal punto de vista politego, el Zanbia el xe nato come na repùblega multipartìtega. Pochi mesi prima de l’indipendensa, la Cexa de Lumpa (on grupo evangelico protestante) la sa meso contro el governo, causando na crisi aministrativa inte le rejoni del nord. Kaunda el xe stà costreto a metare de le legi de emrgensa al nord. Lo stato de emergensa el xe terminà solo che in tel 1991. En tel 1968, la violensa politega el ga costreto Kaunda a intervenir n’antra olta. El presidente el ga meso fora lege tuti i partii eceto che el suo, trasformando così el paexe inte na repblica monopartìtega. Kaunda el ga cotruio la teoria de l’Umanesimo Africano e publicà vari libri do el spiegava el so sistema de socialismo.

A livel rejonale, Kaunda el ga sostegnù i vari movimenti anticoloniali – Angola e Mozanbico – e anti apartheid – Sudafrica e Rhodesia (ancò Zinbabwe). El sostegno econòmego de sti grupi, anca se picinin, el nol ga jutà le finanse del paexe. I governi de la Rhodesia e del Sudafrica i ga de frecuente parmeso a i so servisi segreti de far atentati a Lusaka, la cavedal del paexe. Kaunda el ga sostegnù ance el movimento de i paexi non alineadi, e el xe stà el presidente del movimento dal 1970 al 1973. La mancansa d econpetensa finansiaria de i so governi e la presion de la primavera democràtega de i primi ani novanta le ga costreto Kaunda a parmetare el multipartiismo e nove elesion in tel 1991. El Movimento par la Democrasia Multipartìtega el ga vinto le elesion e Kaunda el ga lasà el posto a Frederick Chiluba el 2 novenbre 1991.

Soto el governo Chiluba, Kaunda el ga soferto varie represion politege. El xe stà acusà de tentare on colpo de stato, ma el ga dimostrà de esare inocente. En te i ultimi ani, Kaunda el ga laorà de frecuente co organizasion internasionali par lo svilupo, i diriti umani, el Global Forum e el ga visità paexi africani in crisi par jutare inte le tratative de transision.

Portałi:
•   Portałe de Africa
|

•   Wikimedia Commons el detien imàjini o altri file so Kenneth Kaunda
•   Scholia el detien schemi gràfeghi so Kenneth Kaunda